2014 ХЕРЕЗ: ФЕЛИПЕ МАСА ГИ ПОДГРЕА АМБИЦИИТЕ НА ВИЛИЈАМС

На четвртиот и последен тест ден во Херез, имавме повторување на вториот тест ден, според временските услови. Изутрината имавме влажна патека, која постепено се сушеше во попладневните часови. Повеќето тимови имаа добар ден, освен Шампионите, тимот на Ред Бул и нивниот втор тим, Торо Росо, кои не беа во можност да извозат повеќе од седум и девет круга, соодветно. Спротивно на тоа, Мерцедес продвижуваните тимови, изгледа како да можеше да извозат колку што посакуваат кругови и повеќе без никакви проблеми. Доброто е што и брзината им е на завидно ниво, па редовно беа меѓу најбрзите болиди на патеката во Херез.

Камуи Кобајаши со Катерам ја поправија сликата за Рено погонските единици, според бројот на извозени кругови, т.е. Јапонецот комплетираше импресивни 54 круга. Инженерите на Рено повторно имаа напорна ноќ за да им се овозможи на Ред Бул, Торо Росо и Катерам да комплетираат повеќе кругови, иако со намалена моќност. Од Рено Ф1, сепак, се убедени дека проблемите со нивната погонска единица ќе бидат решени пред вториот зимски тест во Бахреин.

Ред Бул, тим од кого се очекуваше многу, успеа да комплетира само 21 круга во текот на четирите дена на тестирање. Тие имаа проблеми со ЕРС-системот, т.е. со постојаното прегревање на неговите електронски компоненти, кои дури и се топеле од многу топлина.

Повторно доминација на Мерцедес-придвижуваните болиди, а само Фернандо Алонсо успеваше да им конкурира, исто така, комплетирајќи 115 круга со неговиот Ферари F14 T. На крајот од денот, неговиот поранешен тимски колега, Фелипе Маса, со Вилијамс го постави најбрзото време на последниот ден од првата тест сесија за оваа сезона. Но, најбрзо време во сите денови, останува за Кевин Магнусен.

Со денешниот ден заврши првата тест сесија, на која беа презентирани повеќето болиди, со грди носеви, големи проблеми за Ред Бул и Рено, добар Мекларен, стандарден Ферари, и ако дадеме првична оценка, треба да не очекува интересна, но пред се неизвесна Ф1 сезона. Но, конечната прогноза ќе ја дадеме по завршуањето на последната тест сесија, а втората започнува на 19 февруари, во Бахреин, каде што треба да се приклучи и тимот на Лотус.

 П.    ВОЗАЧ              ТИМ            ВРЕМЕ     РАЗЛИКА КРУГОВИ
 1. Фелипе Маса        Вилијамс        1:28.229              86
 2. Фернандо Алонсо    Ферари          1:29.145   +  0.916  115
 3. Даниел Хункадеља   Форс Индија     1:29.475   +  1.228   81
 4. Кевин Магнусен     Мекларен        1:30.806   +  2.577  110
 5. Луис Хамилтон      Мерцедес АМГ    1:30.822   +  2.593   41
 6. Жил Бјанки         Марусија        1:32.222   +  3.993   25
 7. Адријан Сутил      Заубер          1:36.571   +  8.342   69
 8. Нико Розберг       Мерцедес АМГ    1:36.951   +  8.722   91
 9. Камуи Кобајаши     Катерам         1:43.193   + 14.964   54
10. Дањил Квјат        Торо Росо       1:44.016   + 15.787    9
11. Даниел Рикиардо    Ред Бул         1:45.374   + 17.145    7