Тимот и возачот потпишаа повеќегодишно продолжување на тековниот договор, чие времетраење не е соопштено, но вклучува соработка во ерата на новите регулативи во 2026 година.
Алекс Албон: "Задоволство е што ќе останам во Вилијамс и ќе продолжам да работам со таков тим на талентирани и посветени луѓе."
"Беше тежок почеток на годината, но откако се приклучив на Вилијамс, постигнавме значителен напредок заедно и можам да видам дека промените што се случуваат зад сцената ќе не вратат на врвот."
"Ова е долгорочен проект во кој верувам и сакам да ја одиграм мојата улога, па потпишав повеќегодишен договор. Ќе биде потребно време да се спроведе, но уверен сум дека го градиме вистинскиот тим и ќе постигнеме одлични резултати во наредните години."
Џејмс Воулс, тимски шеф: "Алекс има долгорочна иднина во Вилијамс и ние сме воодушевени поради тоа. Тој е исклучително талентиран возач со силна техничка позадина и одлучност, а потпишувањето со него покажува дека има верба во Вилијамс бидејќи нашиот тим постепено се враќа во натпреварувачка форма."
"Од моментот кога Алекс ни се приклучи, тој покажа способност да се натпреварува за резултати под притисок, а потпишувањето на повеќегодишен договор е уште еден важен елемент на нашиот проект, кој ќе му овозможи на Вилијамс да се искачи на повисоки позиции."
Останува да видиме кој ќе биде неговиот тимски колега, бидејќи континуитетот на Логан Сарџент во моментов е комплициран. Се погласни се шпекулациите за доаѓањето на Андреа Кими Антонели, но тој треба да продолжи да се покажува и докажува во Формула 2 шампионатот пред да стигне до првата лига.
