ДЕН ЗА ТРКИ, НАЈАВА НА МОНАКО ГРАН ПРИ

Ако за повеќето тимови домашна трка е во Силверстоун, тогаш за повеќето возачи домашна може да се смета трката во Монако.

За Чарлс Леклер тоа е вистинскиот дом, а за повеќето е место на живеење. Посетителите, се разбира, имаат тешкотии.

Во Монако речиси да нема хотели, нема аеродром, вработените во тимовите доаѓаат секое утро со воз, има страшен сообраќаен метеж по патиштата од соседната Ница и другите блиски градови и села каде што може да се сместите.

Придружете ни се во нашата ВАЈБЕР група, најбрзиот начин да дојдете до информации поврзани со Формула 1 шампионатот.

КЛИК ТУКА ЗА ДА СЕ ПРИДРУЖИТЕ

СТРИМ ОД ТРКАТА, 15:00 МК, ЌЕ БИДЕ ПОСТИРАН НА ВООБИЧАЕНИОТ НАЧИН ВО НАШИТЕ ВАЈБЕР И ТЕЛЕГРАМ ГРУПИ.

Големата награда на Монако го отвора европскиот дел од сезоната. Во следните осум недели ќе видиме шест трки, три серии со два последователни настани.

Барселона веднаш по Монако, Британија по Австрија и Унгарија по Белгија. Од нив, само Големата награда на Обединетото Кралство ќе биде во спринт форматот.

Тимовите секогаш подготвуваат надградби за првата европска трка, но Монако има толку уникатна патека што ќе биде тешко целосно да се процени нивниот потенцијал, дури и со три тренинг сесии.

Клучни иновации ќе бидат презентирани следната недела во Шпанија, каде што условите се многу посоодветни за тестирање нови елементи.

Пред почетокот на сесиите, градот е блокиран. Локалните жители понекогаш не можат да стигнат до најблиското место каде уживаат во утринското кафе, но во вечерните часови ограничувањата се укинати и таму каде што се одвива Ф1 акцијата, патниот сообраќај продолжува, диџеите настапуваат, фановите се дружат меѓусебно, се троши многу шампањ.

Тоалети нема премногу, па наутро патеката не е во најдобра хигиенска состојба. Но, се тоа е дел од атрактивната уникатност на настанот во Монако.

Тесна улична патека. Речиси е невозможно да се претекнува, но, затоа гледавме едни од најинтензивните квалификациите кога возачот треба да ги нападне лимитите, бидејќи стартната позиција одлучува за се.

Американците веќе не носат партнери и спонзори во Монако, оваа улога сега ја имаат Мајами и Лас Вегас, каде што има се за секој вкус. Сепак, и оваа година има многу скапи јахти во Монако, а тимовите и нивните спонзори ќе ги изнајмуваат за своите гости за да ги почестат со шампањ и да ги поканат на забава по сесиите.

Порано на Формула 1 и требаше Монако, сега на Монако му треба Формула 1 за да го потсетува остатокот од светот еднаш годишно за постоењето на мало Кнежевство на Азурниот брег.

Најмалата грешка води до катастрофални последици, моќноста на погонската единица и аеродинамичната ефикасност речиси и да немаат ефект врз резултатот, бидејќи речиси да нема место каде може да се претекнува.

Формула 1 се трка во Монте Карло од самите почетоци на шампионатот во 1950 година, кога инаугуралната трка ја освои Хуан Мануел Фанџо. Ова е најбавната патека во календарот, нема можности за претекнување, па исходот на трката во голема мера зависи од квалификациите и првиот свиок. Често се вели дека оваа трка се добива во сабота.

Големата Награда на Монако која се состои од 78 круга имаше тенденција да биде релативно едноставна од стратегиска гледна точка, како трка со едно застанување во бокс.

Двете главни варијабли што ја регулираат стратегијата се излегувањето на безбедносното возило, што е честа појава во Монако и времето.

Постои голема веројатност за излегување на безбедносниот автомобил, бидејќи бариерите се толку блиску, така што тимовите имаат за цел да ги искористат тие моменти за "брз" пит-стоп. Проблемот е што овие моменти по природа се непредвидливи.

Неколку опции вклучуваат последен стинт на белите гуми, со старт на црвените или жолтите, со запирање во боксот соодветно помеѓу 29-ти и 35-ти круг или помеѓу 33-ти и 39-ти круг.

Од Пирели веруваат дека тимовите би можеле ефикасно да го искористат поголемото прилепување што го нудат двете помеки смеши.

Со искористување на почетниот грип на црвените гуми, тие потоа можат да се префрлат на жолтите помеѓу 31-от и 37-от круг.

Треба да се има предвид дека прозорците за запирање во боксот можат значително да бидат под влијание на црвените знамиња.

Само треба да се потсетиме што се случи пред две години, кога судир во првиот круг ги испрати сите веднаш во боксот за да го направат она што се покажа како единствено запирање на денот за повеќето возачи.

Дарио Марафуски, Пирели: "Нема друг тркачки викенд во кој квалификациите се толку важни како и самата трка. Всушност, во Монако, позицијата обезбедена во сабота, често го одредува конечниот резултат во недела, бидејќи престигнувањето е исклучително тешко."

"Затоа е јасно дека оние кои што ги поставиле најдобрите времиња трката ќе ја започнат со предност, без оглед на стратегиите што ги осмислиле нивните тимови."

"Ниската деградација на гумите што традиционално се гледа на улиците на Кнежевството им овозможува на тимовите да направат еден пит-стоп за да се исполнат обврската за користење на два типа на смеши."

"Стратегиите можат да се изградат користејќи ги сите достапни гуми, со комбинации кои се многу блиски една до друга во однос на перформансите."

Во петок и сабота возачите работеа на сува патека, а не се очекуваат врнежи ниту во недела. Температурата на воздухот ќе се загрее до 23-от степен со делумна облачност и слаб југо-источен ветер. Веројатноста за врнежи е помала од 5%.

Фред Васер мораше да ги гледа настаните во саботата од телевизор во неговата болничка соба, но денес тимскиот шеф на Ферари ќе се врати во падокот за Големата награда на Монако.

Прес-службата на Ферари, вчера наутро, објави дека Васер е на медицински преглед во локална болница, но нагласи дека нема да бидат објавени дополнителни информации за ова прашање.

Конкретната причина за неговото отсуство не беше наведена, но новинарите што работат на трката потврдуваат дека Васер ќе продолжи да ги извршува своите вообичаени должности, кои вчера привремено ги презеде Жером д'Амброзио, неговиот заменик.

Пред почетокот на сезоната, обложувалниците беа уверени во шампионската титула на Џорџ Расел. Се очекуваше дека комбинација од брзина, искуство и моќен болид ќе му ја донесе на Британецот долгоочекуваната титула, поради што дојде во Мерцедес АМГ.

Кој можеше да замисли дека Џорџ, со претходно доминантниот тим, ќе победи на само пет трки помеѓу 2022 и 2025 година.

Мерцедес АМГ погрешно ги процени претходните прописи, но кога, по новата промена на правилата, Расел победи на трката во Австралија, по што следеше саботниот спринт во Кина, сите беа сигурни дека тоа е почеток на победничка серија.

Но, нешто тргна наопаку. Самодовербата на Расел се должеше и на фактот што минатата година тој целосно го надмина својот млад тимски колега, Кими Антонели, кој правеше многу грешки, често излетуваше од патеката и не беше импресивен во својата дебитантска сезона.

Но, оваа година, Кими ја реализира својата неоспорна природна брзина. По својата прва победа во кариерата во Кина, тој постигна нешто што никој досега не го постигнал, победи на следните три трки.

Да, покрај талентот на Кими, одличниот болид на Мерцедес АМГ е од голема помош.

Да, Расел немаше среќа во Канада, победи на спринтот, стартуваше од Пол позицијата и водеше во трката кога неговиот болид се расипа.

Исходот од тимскиот дуел ќе го дознаеме на крајот од сезоната, но нема сомнение дека ќе биде интересна битка и ќе доведе до многу возбудливи моменти на патеката. И токму тоа ни треба.

Андреа Кими Антонели, спротивставувајќи се на сите предвидувања, пристигна во Монако како лидер во шампионатот со 43 бода предност по четири последователни победи.

Сепак, минатата година, по добриот почеток, Кими имаше разочарувачки европски дел од сезоната. Но, сега ситуацијата е сосема поинаква и тој е многу посигурен.