По најверојатно непроспиената ноќ, први со соопштение од Мекларен: Серџо Перез го заменува Луис Хамилтон. За некого сеуште неискусен за во врвен тим(Ферари), за други исто така неискусен(Мекларен, но што да се прави кога немаш возач), но доволно брз и пожртвуван, спремен за учење на врвните тајни на овој мотоспорт. А дека има таков потенцијал во овој млад возач се покажа на неколку наврати оваа сезона. Наредната сезона Мекларен со дефинирани прв и втор возач, шанса од сенка за Британецот за своја втора титула т.е. ако е доволно добар, како што се тврди.
Најискрената изјава денес е на Серџо Перез:
"Јас сум воодушевен и задоволен што станав возач на Мекларен. Името, Мекларен, е еден од најголемите во историјата на Формула 1 повеќе од 40 години. Мекларен е тим во кој секој возач претендира да вози. Израснав со фантастичните приказни за повеќекратниот светски шампион, Аиртон Сена, со тимот на Мекларен и јас сум навистина почестен што тие ме избрале за тимски колега на Џенсон од 2013 година".
Веднаш по Мекларен се огласи и Мерцедес АМГ, прво соопштувајќи дека Ники Лауда се приклучува кон нивниот тим во менаџерска улога како дел од обновениот напор од овој Германски производител на автомобили да победи во Ф1 шампионатот, а веднаш потоа беше објавено и доаѓањето на Луис Хамилтон.Рос Браун изјави:
"Јас сум воодушевен со доаѓањето на Луис Хамилтон во нашиот тим. Доаѓањето на возач од калибарот на Луис е потврда за положбата на Мерцедес-Бенц во Формула 1 и јас сум горд што Луис ги дели нашата визија и амбиција за успехот на Сребрените стрели. Верувам дека комбинацијата на Луис и Нико ќе биде најдинамичната и највозбудливата тимска постава на патеката следната година, и јас со нетрпение го очекувам она што можеме да го постигнеме заедно." (Така беше и со доаѓањето на Шумахер, но...)
Со потпишувањето на Луис Хамилтон, Мерцедес АМГ сега има сè освен изговори за понатамошни неуспеси. Во речиси три сезони по враќањето во Формула 1 по купувањето на тимот Браун, имаат произведено една победа меѓу бројните неуспеси. Реално, или пак не, Хамилтон мора да го отпише освојувањето на титулата следната година, а неговите и тимските желби за Титули можат да бидат целосно реализирани ако Мерцедес произведе V6 турбо мотор кој ќе биде способен за големи нешта, а тогаш ќе речеме дека Хамилтон направил совршен потег за 2014 година. Но, Хамилтон ги фрли коцките, а како што викаат сите коцкари - што поголем ризик, толку поголема добивка.
Неговата иднина е неизвесна. Седумкратниот шампион не навестува ништо околу тоа дали тој е во потрага по други тимови или ќе се повлече од Формула 1:
"Имав три убави години со тимот, кои за жал не одеа како што сите ние посакувавме од спортска страна. Му посакувам се најдобро на Луис, и со тимот да постигне успех за кој што работевме толку напорно. Јас би сакал да се заблагодарам на тимот за нивната доверба и сите момци за нивната безусловна пожртвуваност. Јас сега ќе се концентрирам на трките што доаѓаат."
Каква ќе биде неговата иднина времето ќе покаже. Го поврзуваат со Заубер, а познавајќи ја неговата желба за тркање не би било чудно и да го видиме и во овој тим.
