ФЕРАРИ НАЈБРЗ СО ВЕТЕЛ, КИМИ СЕ ВРАТИ ВО ЗАУБЕР

Себастијан Ветел забележа најбрзо време на првиот тест ден на патеката Јас Марина во Абу Даби, каде што тимовите за прв пат имаа можност да ги почувствуваат новите смеши на Пирели за 2019 година.

Сесијата траеше девет часа, од 09:00-18:00 часот по локално време, и имаше три прекини со црвено знаме. Пјетро Фитипалди имаше почетни проблеми со Ферари ПЕ во болидот на Хас, Себастијан Ветел имаше излетување надвор од патеката, по кое го оштети болидот на Ферари, и на крај болидот на Заубер зад чиј волан се врати Кими Раиконен, застана на патеката во вториот сектор по комплетирани 102 круга од негова страна.

Вкупно пет возачи се појавија во новите болиди за следната сезона: Кими Раиконен со Заубер, Ландо Норис со Мекларен, Ленс Строл со Форс Индија, Роберт Кубица и Џорџ Расел со Вилијамс.

Чарлс Леклерк во Ферари, Карлос Саинц Јр. со Мекларен, Данил Квајт со Торо Росо ќе дебитираат утре, додека неговиот тимски колега, Александар Албон е во падокот на Јас Марина, но не се планира да дебитира во болидот на Торо Росо.

Кими беше една од главните атракции во неговото враќање во Заубер, неговиот прв тим во Формула 1. Финецот дојде на патеката облечен во комплетно бел комбинезон, без логоа на спонзори. Тој комплетираше 102 круга со посебно внимание на кратки и средни стинтови.

Најбрзото време на Себастијан Ветел беше две секунди побавно од Пол Позицијата на Луис Хамилтон, кој не беше во Јас Марина, а неговиот тимски колега, Валтери Ботас, го имаше второто најбрзо време, четири десетинки зад Ферарито.

Третото најдобро време беше за Ленс Строл, кој во попладневниот дел од сесијата дебитираше во болидот на Форс Индија. Тој сеуште нема официјален договор со тимот, но денешното појавување зад воланот на VJM11 ги отсрани сите сомнежи околу неговата иднина. Не знаеме со кои гуми и колку полн резервоар, но тој беше за половина секунда побрз од својот тимски колега Серџо Перез.

Тимот на Вилијамс, исто така, ги подели возачките должности на двата свои возачи за 2019 година. Џорџ Расел, возеше во утринските часови, забележувајќи го најбрзото време кога на патеката беше најтопло, а попладнето, во малку постудени услови, Роберт Кубица го презеде воланот на Вилијамс и беше побрз за неколку десетинки од својот тимски колега. Двајцата возачи имаа побрзи времиња од тие на Ленс Строл и Сергеј Сироткин забележани на Тренинг сесиите за Големата Награда на Абу Даби.

Пирели ја организира оваа тест сесија за да им даде можност на сите 10 Ф1 тимови да стекнат првично искуство со она што треба да бидат финални смеши за 2019 година. Тимовите слободно може да бираат која смеша сакаат да ја пробаат и можат да ги споредуваат 2019 смеште со тие од оваа 2018 година.

2018 АБУ ДАБИ ТЕСТ - ПРВ ДЕН
П.	ВОЗАЧ	ТИМ	ВРЕМЕ	РАЗЛИКА	КРУГ
1	Себастијан Ветел	Ферари	1:36.812		69
2	Валтери Ботас	Мерцедес АМГ	1:37.231	+ 0.419	120
3	Ленс Строл	Форс Индија	1:37.415	+ 0.603	56
4	Макс Ферстапен	Ред Бул	1:37.947	+ 1.135	133
5	Серџо Перез	Форс Индија	1:37.976	+ 1.164	67
6	Ландо Норис	Мекларен	1:38.187	+ 1.375	138
7	Нико Хулкенберг	Рено	1:38.789	+ 1.977	128
8	Пјетро Фитипалди	Хас	1:39.201	+ 2.389	56
9	Роберт Кубица	Вилијамс	1:39.269	+ 2.457	32
10	Џорџ Расел	Вилијамс	1:39.512	+ 2.700	42
11	Кими Раиконен	Заубер	1:39.878	+ 3.067	102
12	Шон Гелајл	Торо Росо	1:40.435	+ 3.623	150
2018 АБУ ДАБИ Гран При ТРЕНИНГ 1 Макс Ферстапен - Ред Бул - 1:38:491 ТРЕНИНГ 2 Валтери Ботас - Мерцедес АМГ - 1:37.236 ТРЕНИНГ 3 Луис Хамилтон - Мерцедес АМГ - 1:37.176 КВАЛИФИКАЦИИ Луис Хамилтон - Мерцедес АМГ - 1:34.794 ТРКА НАЈБРЗ КРУГ Себастијан Ветел - Ферари - 1:40.867
@МкФормула1 - Република Македонија @MkFormula1 - Republic of Macedonia