ЧАРЛС ЛЕКЛЕР СО НАЈБРЗО ВРЕМЕ, ВЕРСТАПЕН И БОТАС ЗАВРШИЈА ВО БАРИЕРИТЕ

Чарлс Леклер го забележа најбрзото време на попладневниот тренинг на патеката Ред Бул Ринг во Шпилберг, Австрија. Следуваа Ботас, Гасли, Хамилтон. Неочекуван, но пред се, нерелевантен поредок, кој се должи на испрекинатата со црвени знамиња сесија поради повеќето посериозни излетувања.

Валтери Ботас беше на врвот на табелата на почетокот на сесијата кога возачите беа на медиум, жолтите гуми и кога се започна со префрлање на црвените гуми за квалификациски симулации, прв во бариерите заврши Макс Верстапен.

Холанѓанецот се уште беше на жолтите гуми со кои ја започна сесијата кога го загуби задниот дел на болидот на влез во финалниот 10-ти свиок. Ја премина целата зона на излетување исполнета со чакал, и имаше силен удар во заштитните бариери со задниот дел од неговиот RB15, предизвикувајќи значителна штета. Верстапен не беше повреден во инцидентот, а неговиот болид беше брзо отстранет од патеката.

Само што беше сесијата рестартирана и возачите се подготвуваа за своите брзи круга, повторно беа прикажани црвените знамиња, овој пат причинителот беше Валтери Ботас, кој ја загуби контролата врз својот болид во 6-от свиок.

Возачот на Мерцедес АМГ се обиде да ја поправи грешката, но неговиот W10 беше непослушен и со прилично голема брзина заврши во заштитната бариера. Г-сензорот во неговиот кокпит се активираше, па Финецот мораше на превентивен преглед во медицинскиот центар, од каде беше експресно потврдено дека е се ОК.

Неговиот инцидент го спречи тимскиот колега, Луис Хамилтон, да добие чист брз круг и тој заврши со четврто најбрзо време, поставено на белите тврди гуми.

Двајцата возачи на Ферари успеаја да ги комплетираат своите брзи кругови, но Себастијан Ветел имаше уште еден драматичен момент, кога пребрзо влезе во последниот свиок по што изгуби контрола врз Ферарито.

Четирикратниот шампион се лизгаше низ заштитната зона, исполнета со чакал, и имаше среќа да застане паралелно со бариерите и без оштетувања на болидот.

Остануваше Леклер да го забележи најбрзото време, иако и тој беше под развеани жолти знамиња во последниот, 10-ти свиок, во што и успеа со време од 1:05.086, доволно добро за врвот на табелата.

Валтери Ботас го имаше второто место со забележаното време на жолтите гуми, три десетинки побавно од Леклер, додека Пјер Гасли им даде на домашниот тим Ред Бул малку радост со третото место.

Французинот забележа време за 0.401 делови од секундата побавно од Моначанецот. Гасли, исто така, имаше патување низ чакал покрај 4-от свиок за време на сесијата.

Карлос Саинц Јр. со болидот на Мекларен беше петти најбрз пред Роман Грожан од Хаас. Кими Раиконен го освои седмото место пред Ветел и Верстапен, а топ 10 пласманот беше заокружен од Ландо Норис во вториот Мекларен.

Викендот во Австрија продолжува со саботниот тренинг, од 12:00-13:00 часот, по кој следуваат Квалификаците од 15:00 часот по македонско време. Директен пренос на ТВ 24Вести.

ВИДЕО РЕЗИМЕ

2019 АВСТРИЈА ГП - ВТОР СЛОБОДЕН ТРЕНИНГ
П.	ВОЗАЧ	ТИМ	ВРЕМЕ	РАЗЛИКА	КРУГ
1	Чарлс Леклер	Ферари	1:05.086		37
2	Валтери Ботас	Мерцедес АМГ	1:05.417	+ 0.331	12
3	Пјер Гасли	Ред Бул	1:05.487	+ 0.401	33
4	Луис Хамилтон	Мерцедес АМГРед Бул	1:05.529	+ 0.443	43
5	Карлос Саинц ЈР.	Мекларен	1:05.545	+ 0.459	44
6	Роман Грожан	Хас	1:05.701	+ 0.615	38
7	Кими Раиконен	Алфа Ромео	1:05.728	+ 0.642	37
8	Себастијан Ветел	Ферари	1:05.871	+ 0.785	34
9	Макс Верстапен	Ред Бул	1:05.879	+ 0.793	13
10	Ландо Норис	Мекларен	1:05.952	+ 0.867	48
11	Кевин Магнусен	Хас	1:05.960	+ 0.874	41
12	Серџо Перез	Рејсинг Поинт	1:05.964	+ 0.878	43
13	Алекс Албон	Торо Росо	1:06.064	+ 0.978	46
14	Антонио Џовинаци	Алфа Ромео	1:06.119	+ 1.033	37
15	Даниел Квјат	Торо Росо	1:06.148	+ 1.062	38
16	Нико Хулкенберг	Рено	1:06.249	+ 1.163	27
17	Даниел Рикиардо	Рено	1:06.418	+ 1.332	30
18	Ленс Строл	Рејсинг Поинт	1:06.829	+ 1.743	40
19	Џорџ Расел	Вилијамс	1:07.217	+ 2.131	27
20	Роберт Кубица	Вилијамс	1:08.508	+ 3.422	38
ИСТОРИЈА - ХИБРИДНА ЕРА - РЕД БУЛ РИНГ 2014 Луис Хамилтон - Мерцедес АМГ - 1:09.542 2015 Себастијан Ветел - Ферари - 1:09.600 2016 Нико Розберг - Мерцедес АМГ - 1:07.967 2017 Луис Хамилтон - Мерцедес АМГ - 1:05.483 2018 Луис Хамилтон - Мерцедес АМГ - 1:04.579 2019 Чарлс Леклер - Ферари - 1:05.086
@МкФормула1 - Република Македонија @MkFormula1 - Republic of Macedonia