МАКС ФЕРСТАПЕН: НАЈБРЗИТЕ ВРЕМИЊА НЕ СЕ РЕЛЕВАНТЕН ПОКАЗАТЕЛ

Макс Ферстапен и Ред Бул не блескаа на денешните петочни тренинг сесии, иако беа најавувани како најблизок ривал на Мерцедес АМГ. На првиот тренинг забележа време од 1:05.418, што беше доволно за третата позиција на табелата, додека на попладневната сесија имаше мало подобрување на своето најбрзо време од 1:05.215, но сега доволно за 8та позиција. Комплетираше вкупно 78 круга.

"Чувството е добро да се биде назад во болидот и по неколку круга лесно се враќате во ритам. Севкупно, ова беше позитивен ден, болидот се однесуваше добро и јас сум задоволен од бројот на кругови што ги направивме, што е навистина важно по толку долга пауза. Најбрзите времиња не кажуваат ништо, бидејќи го скршив моето предно крило при брзиот круг, па моравме да монтираме друга верзија на предното крило."

"Мислам дека бев премногу агресивен, па затоа имав извртување и излетување надвор од патеката, но ништо значајно. Рабниците се такви какви се и тоа е исто за секого, на предното крило не им се допаѓаат жолтите рабници, затоа мора да бидеме внимателни. Сметам дека имаме доверба во нашиот болид, но секогаш има работи што можеме да ги направиме подобро, но во целина имавме добар ден и со нетрпение го очекувам утрешниот."