Серџо Перез се наоѓа во само-изолација во согласност со упатствата на релевантните органи за јавно здравје и ќе продолжи да ја следи постапката што ја препорачуваат.
Со помош на локалниот организатор на Британското Гран При, локалните здравствени власти и делегатот на ФИА, преземена е иницијатива за целосна истрага и утврдување на сите контакти, кои потоа се ставаат во карантин.
Според Рејсинг Поинт, Серџо се чувствува добро, нема опасни симптоми, но тој е должен да биде во строга изолација, како и оние вработени кои неодамна биле во контакт со него.
Тимот истакна дека планираат да настапат со два болиди овој викенд, а името на возачот кој ќе го замени Мексиканецот ќе биде објавено подоцна. Ова е прв пат оваа сезона да биде откриен позитивен возач. Претходно, во неколку наврати имавме позитивни само членови на тимовите.
Во падокот се шпекулира дека Естебан Гутиерез е на пат кон Силверстон за да навреме се подготви за утрешните тренинг сесии.
UPDATE: Оваа шпекулација се покажа како неточна, а денес од тимот на Рејсинг Поинт официјално објавија дека Нико Хулкенберг ќе биде замената за Серџо Перез на Британското Гран При.
Доцната објава е резултат на повеќе услови кои требаше да бидат поминати, најпрво, негативен корона-тест, чии резултати пристигнаа рано утринава, прилагодување на седиштето за Германецот, позитивно е што базата на тимот е непосредно до патеката и секако одобрување на неговата супер лиценца од страна на ФИА.
Нико Хулкенберг би требало да се натпреварува на најмалку две трки во Формула 1, затоа што Перез ќе се наоѓа во карантин 7-10 дена, па ќе видиме како ќе се одвиваат работите за втората трка во Силверстоун.
