ШОКАНТЕН ПРВ СТАРТЕН РЕД ЗА МЕРЦЕДЕС АМГ

Валтери Ботас го забележа најбрзото време на патеката Браќа Родригез за да стартува од Пол позицијата на утрешната Голема Награда на Мексико Сити. Возачите на Ред Бул не беа во можност да парираат на Мерцедес АМГ, па ќе мораат да се задоволат со старт од вториот ред. Пјер Гасли и Карлос Саинц Јр. ќе стартуваат од третиот.

Ова беше трета Пол позиција во сезоната, 19-та во Ф1 кариерата на Валтери Ботас. Луис Хамилтон беше за само 15 стотинки побавен од својот тимски колега, но придонесе по осумдесетти пат во историјата, првиот стартен ред да биде за Мерцедес АМГ. Според овој показател се израмнија со досега водечкиот тим на Ферари.

Пред почетокот на викендот, многумина го сметаа Ред Бул за фаворит на мексиканскиот викенд, поради тоа што ПЕ на Хонда се поефикасни на голема надморска височина.

Очекувањата беа потврдени на тренинг сесиите, во петокот и саботата, со тоа што возачите на Ред Бул беа половина секунда пред ривалите од Мерцедес АМГ.

Пет возачи ги започнаа квалификациите знаејќи дека ќе загубат места на стартот. Строл, Цунода, Норис и Окон имаат нови погонски единици во своите болиди и ќе ги заземат последните стартни местана гридот, додека Џорџ Расел ќе изгуби пет места за промена на менувачот.

Патеката во Мексико Сити беше изненадувачки правлива, па на почетокот грипот беше минимален, но се подобруваше со секоја наредна сесија. Во петокот на трибините беа присутни 97 илјади фанови, а денес воопшто немаше празни места.

Во Q1 сесијата, возачите на Вилијамс за својот орв обид се решија за жолтите гуми, но не комплетираа брз круг, по што се вратија во боксот. Сите други на патеката излегоа на црвените гуми.

Само седум возачи имаа време да комплетираат брз круг кога сесијата беше прекината, по излетувањето на Ленс Строл на излез од последниот свиок. Канаѓанецот заврши во бариерите покрај патеката, причинувајќи голема штета на својот Астон Мартин.

Тој самостојно излезе од болидот, но поради силината на ударот веднаш беше испратен на превентивен преглед во медицинскиот центар. Сензорот во неговиот болид покажал оптоварување од 12Г, но лекарите набрзо го ослободија возачот.

Беше неопходно да се евакуира неговиот болид, да се отстранат остатоците, како и да се врати TecPro бариерата во првобитната состојба. Прекинот траеше 26 минути, по што квалификациите беа рестартирани.

По квалификациите, стјуардите ja разгледуваа постапката на Раиконен, кој под црвени знамиња по инцидентот на Строл, прво реши да оди во бокс и ја мина белата линија, а потоа се предомисли и повторно ја премина линијата, враќајќи се на патеката. (Одлуката е Укор, втор за Финецот. Трет ќе значи казна од 10 стартни места).

По рестартот на Q1 сесијата, болидот на Саинц Jр. при излез од боксевите ја загуби моќноста од својата ПЕ, но по консултациите со својот тркачки инженер, Шпанецот успеа да забрза.

Најбрзото време го забележа Валтери Ботас, а од понатамошната борба испаднаа: Алонсо, Латифи, Шумахер, Мазепин и Строл.

Во Q2 сесијата, сите, освен казнетите Окон и Цунода, возеа на жолтите гуми при нивниот прв обид, преферирајќи ги за подобар избор за старт на трката. Ферстапен го имаше најбрзото време, но, со време само две стотинки побрзо от тоа на Луис Хамилтон.

Неочекувано, Јуки Цунода го забележа третото најбрзо време на црвените гуми, две десетинки зад Макс. Во вториот обид само Ферстапен, Цунода и Расел се обидоа на црвените гуми, останатите повторно возеа на жолтите.

Серџо Перез се врати во својата гаража без да го комплетира кругот. Хамилтон го забележа најбрзото време, девет илјадитинки пред Ферстапен. Во финалниот сегмент од квалификациите не се пласираа Ветел, Раиконен, Расел, Џовинаци и Окон.

Во последните секунди од сесијата се појавија жолтите знамиња по извртувањето на Џовинаци, кој успеа да избегне посериозен контакт со бариерите покрај патеката.

Во Q3 сесијата сите користеа црвени гуми. Тимските колеги возеа во парови, како би си обезбедиле заветрина. Во првиот обид Ботас беше најбрз со време од 1:15.875. Макс Ферстапен не беше сигурен, се пожали на нестабилен заден крај на болидот, по што загуби три десетинки.

Во решавачкиот обид, Перез имаше задача да обезбеди заветрина за Ферстапен, но, пред нив Цунода излета по што круговите на Перез и Макс беа уништени. Ниту Хамилтон не се подобри, па пол позицијата остана кај Валтери Ботас.

Стартот на Големата Награда на Мексико Сити е закажана за 20:00 часот по Македонско време.

ГОЛЕМАТА НАГРАДА НА МЕКСИКО - КВАЛИФИКАЦИИ
П.	ВОЗАЧ	ТИМ	ВРЕМЕ	РАЗЛИКА
1.	Валтери Ботас	Мерцедес АМГ	1:15.875
2.	Луис Хамилтон	Мерцедес АМГ	1:16.020	+ 0.145
3.	Макс Ферстапен	Ред Бул	1:16.225	+ 0.350
4.	Серџо Перез	Ред Бул	1:16.342	+ 0.467
5.	Пјер Гасли	АлфаТаури	1:16.456	+ 0.581
6.	Карлос Саинц Јр.	Ферари	1:16.761	+ 0.886
7.	Даниел Рикиардо	Мекларен	1:16.763	+ 0.888
8.	Чарлс Леклер	Ферари	1:16.873	+ 0.962
9.	Јуки Цунода*	АлфаТаури	1:17.158	+ 1.283
10.	Ландо Норис*	Мекларен	1:36.830	+ 20.955
Q2 Најбрзо Време: Луис Хамилтон - 1:16.474
11.	Себастијан Ветел	Астон Мартин	1:17.746	+ 1.272
12.	Кими Раиконен	Алфа Ромео	1:17.958	+ 1.484
13.	Џорџ Расел**	Вилијамс	1:18.172	+ 1.698
14.	Антонио Џовинаци	Алфа Ромео	1:18.290	+ 1.816
15.	Естебан Окон*	Алпин	1:18.405	+ 1.931
Q1 Најбрзо Време: Валтери Ботас - 1:16.727
16.	Фернандо Алонсо	Алпин	1:18.452	+ 1.725
17.	Николас Латифи	Вилијамс	1:18.756	+ 2.029
18.	Мик Шумахер	Хас	1:18.858	+ 2.131
19.	Никита Мазепин	Хас	1:19.303	+ 2.576
20.	Ленс Строл*	Астон Мартин	1:20.873	+ 4.146
* Промена на ПЕ - Старт од последен ред ** Промена на менувач - 5 стартни места 107% време: 1:22.098
ХИБРИДНА ЕРА - БРАЌА РОДРИГЕЗ 2015 Нико Розберг - Мерцедес АМГ - 1:19.480 2016 Луис Хамилтон - Мерцедес АМГ - 1:18.704 2017 Себастијан Ветел - Ферари - 1:16.488 2018 Даниел Рикиардо - Ред Бул - 1:14.759 2019 Макс Верстапен - Ред Бул - 1:14.758 2021 Валтери Ботас - Мерцедес АМГ - 1:15.875 @МкФормула1 - Република Македонија @MkFormula1 - Republic of Macedonia