НЕВООБИЧАЕНИ РЕЗУЛТАТИ, КАКО ПОДГОТОВКА ЗА САБОТНИОТ СПРИНТ

Естебан Окон беше најбрзиот возач на вториот тренинг во Бразил, следен од Серџо Перез и Џорџ Расел, во сесијата каде што возачите се фокусираа на тркачкото темпо, што резултираше со необичен редослед на табелата.

Фернандо Алонсо заврши четврти, а Карлос Саинц Јр. најбрзиот Ферари, дури на единаесеттото место.

Големата Награда на Сао Пауло е третиот и последен викенд каде имаме формат со саботен Спринт, така што вториот тренинг е последната шанса на возачите за што подобро адаптирање на патеката.

Болидите се наоѓаат под правилото на затворен паркинг (ParcFerme), што значи дека не се дозволени никакви промени.

Во тимот на Вилијамс, Логан Сарџент, нивниот посакуван избор за следната сезона, привремено го замени Алекс Албон за да комплетира 100 километри и да добие дополнителен поен во неговата суперлиценца. Во Мексико Сити тоа не беше можно поради црвените знамиња.

Прелиминарната прогноза најавуваше голема веројатност за врнежи, но денес тоа не се оствари, а небото се расчисти. Сонцето ги проби ретките облаци, загревајќи го асфалтот, па возачите можеа да работат во приближно исти услови под кои ќе се вози и спринтот и неделната трка.

Во многу тимови, програмата беше поделена, возачите работеа со различни смеши на Пирели со цел да соберат што е можно повеќе информации за да се подготват за трката.

Сесијата помина без проблеми, единствено Николас Латифи имаше излетување низ тревата покрај 12-от свиок, но можеше да продолжи со акција.

Енцо Фитипалди, внук на двократниот Ф1 шампион Емерсон Фитипалди, е примен во младинската програма на Ред Бул. 21-годишниот возач, кој има двојно бразилско-американско државјанство, оваа сезона се натпреварува во Формула 2 и на една трка пред крајот на сезоната го зазема 6-тото место во поединечниот пласман.

Во прилог го имате стартниот редослед на Саботниот Спринт кој е закажан за 20:30 часот по македонско време. Тој беше добиен на вчерашните квалификации, на кои блесна Кевин Магнусен и ја забележа неговата прва Пол позиција, исто така дебитантска и за неговиот тим Хас Ф1.