Сезоната ќе започне со предсезонски тест сесии во Бахреин од 24 до 27 февруари. Патеката Сахир ќе биде домаќин и на првата трка од сезоната од 12 до 14 март, по што Формула 1 ќе се упати кон Саудиска Арабија.
Во април трки се закажани во Австралија, Јапонија и Кина. Во мај, две северноамерикански трки ќе се одржат во Мајами и Канада, по што Монако ќе го отвори европскиот дел од сезоната во првиот викенд од јуни.
Формула 1 потоа ќе се упати во Португалија, по што ќе следат трки во Велика Британија, Австрија, Белгија и Унгарија, пред да започне традиционалната августовска пауза.
Сезоната ќе продолжи првиот викенд од септември во Италија. Потоа ќе се одржат трки во Шпанија, Азербејџан и Турција, која исто така се враќа по долга пауза, но патеката во Истанбул прво мора да помине хомологација од ФИА.
Потоа, Формула 1 ќе се упати кон Сингапур, по што ќе следат четири трки во Северна и Јужна Америка и тоа САД, Мексико, Бразил и Лас Вегас.
Сезоната ќе заврши со две декемвриски трки во Катар и Абу Даби. Како што се очекуваше, 10 трки во 2027 година ќе бидат одржани во спринт формат.
Тоа се Бахреин, Австралија, Јапонија, Канада, Монако, Велика Британија, Италија, Бразил, Катар и Абу Даби.
Календарот веќе е одобрен од Светскиот тркачки совет на ФИА.
