ЛУИС И МАКС НА ПРВИОТ СТАРТЕН РЕД ЗА СПРИНТОТ

Луис Хамилтон во својата прва спринт квалификациска сесија како возач на Ферари, го забележа најбрзото време и ќе стартува од првата позицијата на Спринтот за Големата Награда на Кина.

Британецот беше побрз од Макс Ферстапен за 18 илјадити делови од секундата и двајцата максимално ги искористија грешките на двата возачи на Мекларен.

Ландо Норис повторно го "надфорсира" Мекларенот, нешто за што беше неколку пати потсетен да не го прави на минатата трка во Австралија.

Сепак, иако стартуваат подолу во поредокот, Мекларен останува главен фаворит за победата на утрешниот спринт и вистинските квалификации.

Да потсетиме дека во спринт квалификациите почетните сегменти, SQ1 и SQ2, задолжително се возат на нов сет на жолти пневматици.

Најбавен од 20-те возачи беше Лиам Лосон. Уште еден неуспех за младиот талент на Ред Бул, кој не успева да се истакне со својот нов болид.

Лосон беше придружуван од двата возачи на Алпин, со Џек Дуан пред Пјер Гасли и двајца поранешни возачи на Рено, Естебан Окон и Нико Хулкенберг.

Во SQ2 видовме повеќе грешки. Ветерот се засили, па возачите почнаа повеќе да грешат. На некои од фаворитите им требаше втор брз круг во последните моменти од сесијата да се пласираат понатаму, вклучително и возачите на Ферари и Мерцедес АМГ.

Најбрзото време го имаше Ландо Норис и тоа со голема разлика. Понатамошната борба не ја продолжи Фернандо Алонсо и со заостанување од само 0.021 делови од секундата се најде на единаесеттата позиција.

Одличен мега круг на Оливер Берман со болидот на Хас за 12-тото најбрзо време, пред Карлос Саинц Јр. со Вилијамс кој не можеше да го следи темпото на својот тимски колега за понатамошен пласман во SQ3 сегментот.

Габриел Бортолето, уште еднаш подобар од Нико Хулкенберг, не можеше да направи повеќе чуда со Заубер, и Исак Хаџар, по грешката во првиот свиок, со 14-то и 15-тото најбрзо време.

Во SQ3 битката се одвиваше на црвените гуми. Први излегоа возачите на Мекларен и Мерцедес АМГ, а Пјастри го имаше најбрзото време од 1:30.929, три десетинки пред Норис, кој овојпат му недостигаше брзина.

Возачите на Ферарите на патеката излегоа подоцна, за само еден брз круг, но на инспирираниот Хамилтон не му требаше повеќе од тоа. Луис го победи времето на Пјастри за 0.080 и ја освои првата позицијата.

Меѓу последните на патеката и исто така само за еден брз круг беше и Макс Ферстапен, кој иако се гледаше дека има големи проблеми со "немирниот" РБ21 успеа да се доближи времето на Хамилтон и му недостасуваа само 18 илјадитинки за старт од првата позиција, што е најава за добар саботен спринт.

Пјастри на крајот заврши трет, а Норис шести. Леклер и Расел ги разделуваат двата папаја болиди на четврта и петта позиција соодветно. Кими Антонели можеше повеќе од седмата позиција.

Јуки Цунода беше најдобар од останатите со осмо најбрзо време, пред Ленс Строл и Алекс Албон. Битката за последната позиција која носи поени на спринтот ќе биде многу неизвесна.

Утрешниот Спринт за Големата Награда на Кина е закажан за 04:00 часот, а потоа следуваат вистинските Квалификации во 08:00 часот по македонско време.

По завршување на спринт квалификациите, Чарлс Леклер и Ленс Строл беа повикани кај стјуардите поради премногу бавно возење.

Потенцијалните казни за овие прекршувања, што резултираат со губење на стартни позиции, се применуваат само за саботниот спринт.

Стјуардите не ги казнија Чарлс Леклер и Ленс Строл.

Моначанецот ги објасни своите постапки велејќи дека забавил за да го пушти Луис Хамилтон бидејќи бил во брз круг, додека Ленс ја намалил брзината за да го пушти Ландо Норис.

Бидејќи Леклер и Строл не попречија никому со своите постапки, стјуардите ги оставија нивните прекршоци без последици.