Се истакнува дека добавувачите чекале неколку месеци за нивните фактури да се платат, пред поднесување на тужби против Заубер кај официјалниот Швајцарски регистар на должници - Betreibungsregister.
Заубер, исто така, должи пари и на снабдувачот со мотори, Ферари, а се шпекулира дека имаат потреба од дополнителни 30.000.000 долари во буџетот за 2013 сезоната, кои треба да бидат набавени што побрзо.
"Ние сме во контакт со нашите добавувачи и вложуваме максимални напори да се излезе од оваа ситуација што е можно побрзо." - вели основачот на овој тим Питер Заубер.
Гласините се дека тимот на Заубер е во преговори со финансиски спасител од Русија, но и дека се преговара за спој со меѓународен производител на автомобили од Азија. Тешки денови за Заубер Ф1, но и за речиси сите помали Ф1 тимови.
Но, тешката ситуација нема да ги спречи да учествуваат на три-дневната тест сесија во Силвертоун, каде ќе ги тестираат најновите гуми на Пирели, како и новите надградби на C32, за претстојното Унгарско Гран При.
За овој тим ќе тестираат Робин Фрајнс, Нико Хулкенберг и Кимија Сато, кој за прв пат ќе вози Формула 1 болид, и ќе настапи во петокот.
Овој 24-годишен Јапонски возач носи искуство од сериите како Формула БМВ, Јапонската и Германската Формула 3, како и Формула 3 Еуро серијата. Тој во моментов води во 2013 Шампионатот на АУТО ГП серијата.
