2014 БАХРЕИН II ТЕСТ: ЛУИС ХАМИЛТОН СО ПОТВРДА НА ДОБРАТА ФОРМА НА МЕРЦЕДЕС

Луис Хамилтон на последниот ден од пред сезонските тест сесии го забележа најбрзото време за Мерцедес АМГ, и со тоа го потврди добриот впечаток за тимовите кои ја користат Мерцедес ПЕ. Иако Хамилтон имаше потешкотии на почетокот од сесијата со менувачот на неговиот W05, по само пет комплетирани круга, но го надополни изгубеното време во попладневните часови, кога го имаше и најбрзиот круг на денот. Сепак, не успеа за само 0,02 секунди да го надмине најбрзото време на Фелипе Маса, забележано во текот на вчерашниот ден. Неговиот тимски колега, Валтери Ботас, во поголемиот дел од денот беше на чело на табелата, но во финишот FW36 имаше механички проблем.

Фернандо Алонсо беше трет најбрз за Ферари, но, и неговиот тест ден беше прекинат поради промена на менувачот. Тој успеа да комплетира 74 круга. Неговото денешно време беше најбрзото за F14 T, за време на осумте тест дена на патеката Шакир. Истиот број на кругови со Италијанскиот тим, денес имаа Форс Индија и Торо Росо. Тимот со најмногу комплетирани круга беше Заубер. Двајцата возачи кои имаа на располагање по половина сесија, извозеа импресивни 177 круга, а тоа е 40 круга повеќе од било кој тим во текот на 12-те тест дена. Сутил со шестото, а Гутиерез со осмото најбрзо време на денот.

Себастијан Ветел имаше уште еден фрустрирачки ден, а RB10 имаше механички проблем на предниот дел на болидот, поради кој светскиот шампион имаше излетување надвор од патеката пред паузата за ручек. Се врати на патеката во попладневните часови, и стигна до 77 круга, но со намалено темпо. Беше деветти најбрз, но со повеќе од четири секунди зад најбрзото време.

Роман Грожан и Лотус Ф1 и последниот тест ден пред стартот на сезоната, го завршија предвреме, со само 32 круга, и уште еднаш проблеми со ПЕ на Рено.

Детална анализа и нашите заклучоци за текот на пред сезонските тест сесии следува во наредните денови, а со нестрпливост го очекуваме стартот на Австралиското Гран При на 16 Март.

 П.    ВОЗАЧ              ТИМ            ВРЕМЕ     РАЗЛИКА КРУГОВИ
 1. Луис Хамилтон      Мерцедес АМГ    1:33.278               69
 2. Валтери Ботас      Вилијамс        1:33.987   +  0.709   108
 3. Фернандо Алонсо    Ферари          1:34.280   +  1.002    74
 4. Нико Хулкенберг    Форс Индија     1:35.577   +  2.299    74
 5. Жан-Ерик Верн      Торо Росо       1:35.701   +  2.423    74
 6. Адријан Сутил      Заубер          1:36.467   +  3.189    91
 7. Макс Чилтон        Марусија        1:36.835   +  3.557    61
 8. Естебан Гутиерес   Заубер          1:37.303   +  4.025    86
 9. Себастијан Ветел   Ред Бул         1:37.468   +  4.190    77
10. Џенсон Батон       Мекларен        1:38.111   +  4.833    22
11. Камуи Кобајаши     Катерам         1:38.391   +  5.113   106
12. Роман Грожан       Лотус           1:39.302   +  6.024    32

На крајот од денешниот ден од Пирели ги објавија смешите кои ќе се користат во првите 4 трки од 2014 сезоната.

      ТРКА             ИЗБОР НА ГУМИ                      
 1. Австралија                Меки    Медиум   
 2. Малезија                          Медиум      Тврди   
 3. Бахреин                   Меки    Медиум   
 4. Кина                      Меки    Медиум