АНАЛИЗА И БРОЈКИ ПО ВТОРАТА ТЕСТ СЕСИЈА ВО БАХРЕИН

Најголемата промена за оваа сезона е смената на V8 моторите со хибридни V6 Турбо Погонски единици, а 11-те тимови ги снабдуваат 3 производители. Пред сезонските тест сесии ни покажаа дека Мерцедес е на врвот, Рено на дното, а Ферари некаде во средината. Заклучоците од почетната сесија во Херез се провлекуваа и низ останатите две сесии во Бахреин, а од Ф1 тимовите како најголем фаворит се издвои Мерцедес АМГ. Следуваат заклучоци за секој тим пооделно, според фаворитската улога и нивната форма, т.е. кој би имал најголеми шанси за победата во Мелбурн. Рангирањето го правиме врз база на извештаите од присутните аналитичари, кои во живо ги следеа овие сесии, како и забележаните времиња од секој тест ден.

МЕРЦЕДЕС АМГ И ВИЛИЈАМС
Перформансите на Мерцедес АМГ е тешко да се игнорираат во текот на тестирањето, а со тоа ја добија и фаворитската улога. Тие се најдалеку со својата тест програма, и тоа без некои посериозни проблеми, не дека се беше совршено, но тие не беа ни во близина на проблемите што ги доживува Ред Бул. Единствена загриженост преставува количината од 100кг гориво и за да се издржи цела трка, мора да се намали темпото во одредени периоди. Клучна ќе биде комуникацијата на возачот со своите инженери, кои ќе следат голем број параметри на болидот. Го имаат најбрзото време во Бахреин, ако одземеме 0,7 сек.(разликата помеѓу меките и супер-меките гуми на Пирели) од времето на Луис, и можеби ќе беа единствениот тим под 1:33 во Бахреин.
Логично, тимовите што ја користат Мерцедес ПЕ имаа голем напредок. Најголем напредок можеби има тимот на Вилијамс кој доживува ренесанса. Вилијамс покажа добри перформанси, FW36 потврди дека има брзина, квалификациско темпо, можеби тркачкото темпо не е баш како треба, но издржливоста е на завидно ниво. Вилијамс Ф1 изгледа способен за многу добри резултати. Се благодарение на смената на Рено со Мерцедес, доведувањето на Пат Сајмондс и на крај одбирањето искусен возач, на местото од платеник. А парите почнаа сами да си доаѓаат, и тоа од сите страни. Не знаеме дали ќе има доволно место за логоата на сите нови партнери на тимот. Се очекува уште објава на главниот финансиер - Мартини, кој ќе даде посебен шмек на Вилијамс Ф1.

МЕКЛАРЕН
Мекларен е тимот кој е пријатно изненадување, особено по нивната слаба 2013 сезона. MP4-29 иако има проблеми со електрониката, тестирањето го поминаа на високо ниво. Џенсон Батон и неговиот нов тимски колега Кевин Магнусен имаа добро темпо на долги стинтови и забележаа неколку најбрзи времиња во текот на тест сесиите. Загрижува фактот што почетокот на тест сесиите беше поветувачки за нив, за разлика од последните денови, кога проблемите беа позабележителни, а по правило тоа би требало да биде обратно. Кога еден дебитант се чуствува одлично во МП4-29 и веднаш забележува добри времиња, покажува конзистентност при подолгите стинови, може да кажеме дека во Мекларен добро ја завршиле својата домашна задача. Уникатниот дизајн на задната амортизација го привлече вниманието на ривалите, и иако ова беше само тест, може да кажеме дека Мекларен се враќа меѓу најдобрите тимови, што е добро за Формула 1.

ФЕРАРИ И ФОРС ИНДИЈА
Како и во изминатите години, Ф14 Т, не е најбрзиот болид на патеката. Мерцедес со пофалби од сите страни, Рено се знае дека е во големи проблеми, а Ферари?!? Тие ја држат златната средина. Според нивниот тимскиот шеф, Стефано Доменикали, тие моментално се на третото место, позади Мерцедес АМГ и Вилијамс. Ние би го додале и Мекларен. Еден од битните фактори за добар настап ќе биде издржливоста на болидот, а таа е на завидно ниво. Но, тоа повеќе важи кога е во рацете на Фернандо Алонсо, за разлика кога зад воланот беше Кими Раиконен. Според некои аналитичари, тоа дава јасно до знаење кој е прв, а којо втор возач во Ферари. Нивото на развој на годинешните болиди е големо, па пред почетокот Ферари, но и сите останати тимови имаа шанси за голем напредок. Како и да е, Италијанците повторно ќе ги бркаат болидите пред себе, и нема да го предводат поредокот.
Форс Индија, како и сите останати болиди што користат Мерцедес ПЕ, се во добра форма, можеби малку заостанува зад останатите три "Мерцедеси", но според постигнатото на тестирањата може да се каже дека е на исто рамниште со Ферари. Аналитичарите добра страна на VJM07 ја гледаат во "нежноста" кон гумите на Пирели, што е одлично за добри резултати во трка. Со доведувањето на Нико Хулкенберг и Серџо Перез, имаат и возачки тандем за да се извлече максимумот од болидот, па така не би се изненадиле и ако се борат за подиумот во Австралија.

РЕД БУЛ И ЛОТУС

Ред Бул и Лотус, едни од водечките тимови од изминатите сезони, немаа можност да го покажат својот вистински потенцијал, а тоа ќе се случи кога ќе успеат да ја "оладат" Рено ПЕ. Двата тимови ќе имаат напорна домашна задача се до последниот ден пред стартот на сезоната.

Е сега, тимот од Милтон Кејнс има повеќе потенцијал, многу поголеми ресурси на располагање и е прашање на време кога ќе го видиме вистинското лице на RB10. Самите изјавија дека брзо решение не е возможно, а краен рок е почетокот на Европскиот дел од сезона. Ако проблемите бидат решени во тој временски период, повторно ќе ги гледаме во борба за највисоко место на подиумот. RB10 го покажа тоа во ретките моменти кога се работеше како треба. Проблем не е брзината, туку издржливоста. Според некои аналитичари, тие се повторно најбрзиот болид во кривините, каде се прави добра предност.
Лотус Ф1 е во потешка ситуација, имаат финансиски проблеми, еден возач платеник, кој не знае ништо за болидот, другиот неискусен, па многу потешко ќе ја вратат формата во која беа изминатите неколку сезони.

МАРУСИЈА, ТОРО РОСО, ЗАУБЕР, КАТЕРАМ

Четири тимови, два со Ферари, два со Рено ПЕ, првите два со помала километража, но побрзи времиња, вторите два поминаа добра километража, но според брзината заостануваат многу. Но, прашањето е дали ќе бидат во можност за да се борат за освојување на првите поени.
 
Во прилог се комбинираните табели од двете тест сесии во Бахреин, од кои може да донесете и некои сопствени заклучоци, кои може да ги споделите со нас со коментари на нашата ФБ страница!!!

 П.    ВОЗАЧ              ТИМ            ВРЕМЕ     РАЗЛИКА  ГУМИ 
 1. Фелипе Маса        Вилијамс        1:33.258              НСМ
 2. Луис Хамилтон      Мерцедес        1:33.278   +  0.020   УМ
 3. Нико Розберг       Мерцедес        1:33.283   +  0.025   НМ
 4. Валтери Ботас      Вилијамс        1:33.987   +  0.729   НМ
 5. Фернандо Алонсо    Ферари          1:34.280   +  1.022   НСМ
 6. Кевин Магнусен     Мекларен        1:34.910   +  1.652   НСМ
 7. Џенсон Батон       Мекларен        1:34.957   +  1.699   НМ
 8. Серџо Перез        Форс Индија     1:35.290   +  2.032   НМ
 9. Кими Раиконен      Ферари Ферари   1:35.426   +  2.168   НСМ
10. Нико Хулкенберг    Форс Индија     1:35.577   +  2.319   НСМ
11. Жан-Ерик Верн      Торо Росо       1:35.701   +  2.443   НСМ
12. Даниел Рикиардо    Ред Бул         1:35.743   +  2.485   НМ
13. Дањил Квјат        Торо Росо       1:36.113   +  2.855   НСМ
14. Адријан Сутил      Заубер          1:36.467   +  3.209   НСМ
15. Макс Чилтон        Марусија        1:36.835   +  3.577   НСМ
16. Жил Бјанки         Марусија        1:37.087   +  3.829   НСМ
17. Естебан Гутиерес   Заубер          1:37.180   +  3.922   НМ
18. Себастијан Ветел   Ред Бул         1:37.468   +  4.210   УМ
19. Фелипе Наср        Вилијамс        1:37.569   +  4.311   НМед
20. Маркус Ериксон     Катерам         1:38.083   +  4.825   НСМ
21. Камуи Кобајаши     Катерам         1:38.391   +  5.133   НМ
22. Пастор Малдонадо   Лотус           1:38.707   +  5.449   НМ
23. Роман Грожан       Лотус           1:39.302   +  6.044   НМ
24. Робин Фријнс       Катерам         1:42.534   +  9.276   УМед

 П.    ВОЗАЧ              ТИМ            КРУГА  КИЛОМЕТРИ 
 1. Валтери Ботас      Вилијамс           407      2202
 2. Нико Розберг       Мерцедес АМГ       366      1980
 3. Фернандо Алонсо    Ферари             357      1931
 4. Естебан Гутиерес   Заубер             343      1856
 5. Нико Хулкенберг    Форс Индија        326      1763
 6. Луис Хамилтон      Мерцедес АМГ       300      1623
 7. Серџо Перез        Форс Индија        289      1563
 8. Маркус Ериксон     Катерам            274      1482
 9. Адријан Сутил      Заубер             270      1460
10. Кими Раиконен      Ферари             267      1444
11. Фелипе Маса        Вилијамс           267      1444
12. Џенсон Батон       Мекларен           243      1314
13. Кевин Магнусен     Мекларен           234      1753
14. Жан-Ерик Верн      Торо Росо          212      1146
15. Камуи Кобајаши     Катерам            208      1125
16. Дањил Квјат        Торо Росо          198      1071
17. Жил Бјанки         Марусија           161       871
18. Себастијан Ветел   Ред Бул            151       817
19. Даниел Рикиардо    Ред Бул Рено       148       800
20. Пастор Малдонадо   Лотус              147       795
21. Макс Чилтон        Марусија           126       681
22. Роман Грожан       Лотус               91       491
23. Фелипе Наср        Вилијамс            87       470
24. Робин Фријнс       Катерам             68       368

 П.    ТИМ          КРУГА   КИЛОМЕТРИ 
 1. Мерцедес АМГ     974      4967
 2. Вилијамс         936      4893
 3. Ферари           875      4489
 4. Мекларен         812      4153
 5. Заубер           776      4039
 6. Форс Индија      761      3975
 7. Катерам          626      3313
 8. Торо Росо        465      2463
 9. Ред Бул          320      1711
10. Марусија         317      1686
11. Лотус            238      1288

 П. ПРОИЗВОДИТЕЛ   КРУГА    КИЛОМЕТРИ 
 1. Мерцедес        3483     17989
 2. Ферари          1968     10213
 3. Рено            1649      8776

* Табелите се однесуваат на 8-те тест дена во Бахреин