2015 БРАЗИЛ ГП: КОЈ БЕШЕ НАЈБРЗ НА ПРВИОТ ТРЕНИНГ?

Луис Хамилтон не се снајдува најдобро во своите изјави, но колку добар возач е покажува на патеките. Британецот го забележа најбрзото време на првиот тренинг за Големата Награда на Бразил, која се одржува на патеката Карлос Пејс, Сао Пауло. Тој беше за 0.519 секунди побрз од својот тимски колега, Нико Розберг, навестувајќи дека Сребрените стрели ќе бидат во својата препознатлива форма и овој тркачки викенд со кој се завршува турнејата по Американскиот континент.

Од тркачки аспект нема некоја возбуда за нас фановите, бидејќи се е решено и запечатено можеби уште пред почетокот на оваа 2015 сезона. Првата утринска сесија помина вообичаено и без некои поголеми возбудувања, како и секогаш ги видовме болидите со чудни сензори и "нормални" излетувања надвор од патеката и блокирање на тркалата. Најголемиот инцидент го имаше Кими Раиконен, кој успеа да го исконтролира болидот на Ферари при неговото излетување во 4-от свиок, и да помине без никакви оштетувања.


Но, ајде да си најдеме некои споредни работи за да ни биде интересен овој викенд. Верувале или не, Луис Хамилтон, сега трикратен Ф1 Шампион, никогаш не победил во Бразил. Дали на ова трка тоа ќе му појде од рака?!? Нико Розберг, победникот тука пред 12 месеци, како и на претходната трка во Мексико е решен да не му ја дозволи таа радост. Но, ако по утрото денот се познава, тешко да успее во таа намера.

Друг возач, кој очајно посакува силен викенд е локалниот херој, Фелипе Маса. На домашен терен тој има 2 Победи и 5 пласмани на Победничкиот подиум. Публиката секогаш го понесува да направи добри резултати, но на оваа сесија не се покажа баш во најдобро светло. Истото важи и за неговиот сонародник, Фелипе Наср, кој за прв пат ќе настапува домашните навивачи.

Времето во Бразил е сончево, но метеоролозите најавуваат шанси за дождлива недела. Вториот тренинг започнува во 17 часот по македонско време.

2015 БРАЗИЛ ГП - ПРВ СЛОБОДЕН ТРЕНИНГ

 П.     ВОЗАЧ             ТИМ           ВРЕМЕ      РАЗЛИКА КРУГОВИ
 1. Луис Хамилтон       Мерцедес АМГ  1:13.543              28
 2. Нико Розберг        Мерцедес АМГ  1:14.062   +  0.519   36
 3. Себастијан Ветел    Ферари        1:14.168   +  0.625   27
 4. Даниел Рикиардо     Ред Бул       1:14.449   +  0.906   27
 5. Кими Раиконен       Ферари        1:14.549   +  1.006   20
 6. Данил Квјат         Ред Бул       1:14.696   +  1.153   25
 7. Валтери Ботас       Вилијамс      1:14.886   +  1.343   25
 8. Макс Ферстапен      Торо Росо     1:14.960   +  1.417   38
 9. Нико Хулкенберг     Форс Индија   1:15.174   +  1.631   33
10. Пастор Малдонадо    Лотус         1:15.192   +  1.649   31
11. Карлос Саинц ЈР.    Торо Росо     1:15.314   +  1.771   38
12. Џолион Палмер       Лотус         1:15.352   +  1.809   33
13. Џенсон Батон        Мекларен      1:15.379   +  1.836   28
14. Фелипе Наср         Заубер        1:15.381   +  1.838   29
15. Серџо Перез         Форс Индија   1:15.408   +  1.865   32
16. Фернандо Алонсо     Мекларен      1:15.415   +  1.870   29
17. Фелипе Маса         Вилијамс      1:15.469   +  1.926   24
18. Маркус Ериксон      Заубер        1:15.798   +  2.255   34
19. Александар Роси     Манор         1:17.860   +  4.317   23
20. Вил Стивенс         Манор         1:18.090   +  4.547   22

ПОД ПРОСЕК: Заубер, Мекларен
НАД ПРОСЕК: Ред Бул

* 2014 - Нико Розберг - Мерцедес АМГ - 1:12.764