2016 АВСТРАЛИЈА ГП: ДОСАДНИ И БЕСМИСЛЕНИ ПЕТОЧНИ ТРЕНИНЗИ

2016 Формула 1 сезоната започна во раните утрински часови по Македонско време со двата слободни тренинзи за Големата Награда на Австралија. Денес, на патеката во Алберт Парк се сменија сите годишни времиња во еден ден, дожд, сонце, силен ветер, недостигаше уште снег да заврне. Логично расплет на ситуацијата е дека нити на првата, нити на втората попладневна тренинг сесија не видовме репрезентативни времиња од кои би извлекле заклучок за перформансите на Ф1 тимовите. Австралија секогаш не остава без спиење за бадијала, а за нешто повеќе останува да го чекаме третиот слободен тренинг, а можеби и самите квалификации.

Предпладневниот тренинг започна со влажна патека и првиот возач што комплетираше круг беше Нико Розберг со болидот на Мерцедес АМГ, користејќи ги зелените, интермедиа, гуми за влажно време на Пирели. Патеката почна да се суши по еден час од почетокот на сесијата, кога Даниел Рикиардо забележа време на медиум гуми и веднаш се најде на првото место на табелата. Во следните 20-тина минути беше период кога патеката беше најсува во текот на целиот ден. Луис Хамилтон го искористи тоа за поставување на најбрзото време на денот, наговестувајќи дека и оваа сезона можеби многу полесно од очекувањата ќе стигне до нова титула.

Дефинитивно добар настап имаше тимот на Форс Индија, кој секогаш беше при врвот на табелата и со двата свои возачи, Нико Хулкенберг и Серџо Перез веднаш зад него. Како што се ближеше предпладневната сесија кон својот крај, дождот повторно започна да паѓа со поголем интензитет, па патеката повторно стана невозможна за возење на гумите за суво време. Даниел Рикиардо и Кими Раиконен ја завршија сесијата во чакалот покрај патеката. Забележаните времиња не може да се употребат за некоја посериозна анализа бидејќи временските услови се менуваа од круг до круг.

Вториот тренинг започна со уште повлажни услови од утрината, па затоа на почетокот никој од возачите не се осмелуваше нити да помисли да излезе на патеката. Нико Розберг беше првиот кој се обиде и ни демонстративно ни покажа дека асфалтот се уште е влажен. Германецот притисна малку повеќе на педалата за гас при излезот од седмиот свиок, следуваше губење на контрола врз својот болид и судир со заштитната ограда покрај патеката, со последица искршено предно крило. До крајот на тренингот тој не се врати во акција, бидејќи во тимот на Мерцедес АМГ имале само едно резервно предно крило. Во текот на ноќта треба да пристигне ново.

Кога патеката беше доволно сува, Кими Раиконен го диктираше темпото на медиум гумите, пред Даниел Рикардо од Ред Бул. Се тоа траеше се додека Луис Хамилтон не се реши да излезе на патеката, по загревачкиот круг го постави најбрзото време и повторно се паркираше во својата гаража. Тој без никакви проблеми беше 6 десетинки побрз од најдоброто време на Раиконен. Следуваше, Нико Хулкенберг со 4 десетинки побавно време од она на Хамилтон.

На 15-тина минути до крајот, повторно дожд, и стопирање на секаква акција на патеката. На крај имавме, генерално досаден и многу бесмислен ден за Ф1 тимовите, возачите и нас фановите. Сите се надеваат на сончево време за третиот слободен тренинг и колку-толку да ги поминат планираните програми за подесување на болидот. Ако се случи тоа ќе имаме многу акција, а со тоа и гужва на саботниот тренинг, кој започнува во 4 часот наутро по македонско време. Квалификациите се закажани за 7 часот.

РЕЗУЛТАТИ ОД ПРВИОТ ТРЕНИНГ

П.	ВОЗАЧ	ТИМ	ВРЕМЕ	РАЗЛИКА	КРУГА
1	Луис Хамилтон	Мерцедес АМГ	1:29.725		14
2	Данил Квјат	Ред Бул	1:30.146	+ 0.421	14
3	Даниел Рикиардо	Ред Бул	1:30.875	+ 1.150	13
4	Нико Хулкенберг	Форс Индија	1:31.325	+ 1.600	7
5	Макс Ферстапен	Торо Росо	1:31.720	+ 1.995	13
6	Нико Розберг	Мерцедес АМГ	1:31.814	+ 2.089	11
7	Фернандо Алонсо	Мекларен	1:33.060	+ 3.335	11
8	Џенсон Батон	Мекларен	1:33.129	+ 3.404	16
9	Серџо Перез	Форс Индија	1:33.370	+ 3.645	5
10	Кевин Магнусен	Рено	1:34.060	+ 4.335	12
11	Валтери Ботас	Вилијамс	1:34.550	+ 4.825	6
12	Фелипе Маса	Вилијамс	1:34.679	+ 4.954	6
13	Фелипе Наср	Заубер	1:34.796	+ 5.071	7
14	Џолион Палмер	Рено	1:35.477	+ 5.752	12
15	Маркус Ериксон	Заубер	1:37.956	+ 8.231	6
16	Паскал Верлајн	Манор	1:40.401	+ 10.676	5
17	Кими Раиконен	Ферари	1:40.754	+ 11.029	10
18	Естебан Гутиерез	Хас	1:41.780	+ 12.055	8
19	Рио Харјанто	Манор	1:43.372	+ 13.647	6
20	Роман Грожан	Хас	1:43.443	+ 13.718	6
21	Себастијан Ветел	Ферари	/	/	8
22	Карлос Саинц ЈР.	Торо Росо	/	/	3

* 2014: Фернандо Алонсо - Ферари - 1:31.840
* 2015: Нико Розберг - Мерцедес АМГ - 1:29.557

РЕЗУЛТАТИ ОД ВТОРИОТ ТРЕНИНГ

П.	ВОЗАЧ	ТИМ	ВРЕМЕ	РАЗЛИКА	КРУГА
1	Луис Хамилтон	Мерцедес АМГ	1:38.841		4
2	Нико Хулкенберг	Форс Индија	1:39.308	+ 0.467	8
3	Кими Раиконен	Ферари	1:39.486	+ 0.645	7
4	Даниел Рикиардо	Ред Бул	1:39.535	+ 0.694	8
5	Карлос Саинц ЈР.	Торо Росо	1:39.786	+ 0.945	14
6	Фернандо Алонсо	Мекларен	1:39.895	+ 1.054	16
7	Џенсон Батон	Мекларен	1:40.008	+ 1.167	12
8	Себастијан Ветел	Ферари	1:40.761	+ 1.920	7
9	Серџо Перез	Форс Индија	1:41.256	+ 2.415	8
10	Данил Квјат	Ред Бул	1:42.411	+ 3.570	10
11	Естебан Гутиерез	Хас	1:42.891	+ 4.050	8
12	Паскал Верлајн	Манор	1:43.401	+ 4.560	22
13	Роман Грожан	Хас	1:43.731	+ 4.890	7
14	Рио Харјанто	Манор	1:44.304	+ 5.463	22
15	Нико Розберг	Мерцедес АМГ	1:47.356	+ 8.515	4
16	Кевин Магнусен	Рено	/	/	1
17	Џолион Палмер	Рено	/	/	4
18	Фелипе Маса	Вилијамс	/	/	1
19	Валтери Ботас	Вилијамс	/	/	1
20	Маркус Ериксон	Заубер	/	/	0
21	Фелипе Наср	Заубер	/	/	0
22	Макс Ферстапен	Торо Росо	/	/	0