КУБИЦА КОМПЛЕТИРАШЕ 100 КРУГА ЗА ВИЛИЈАМС

Роберт Кубица комплетираше 100 круга зад воланот на 2017 Вилијамс Ф1 болидот на тест сесијата во Абу Даби, организирана од Пирели за евалуација на нивните 2018 гуми. Полскиот возач имаше најбрзо време од 1:41.296 на меката смеша, заземајќи го осмото место на табелата. Според присутните на патеката, од тимот на Вилијамс се задоволни со повратните информации и податоци собрани по реализирањето на планираната тест програма.

Кубица ќе добие уште неколку часа во текот на утрешниот тест ден, кога ќе го преземе болидот од Сергеј Сироткин, кој е сериозен против-кандидат на Полјакот за второто возачко место во Вилијамс. Помали шанси за слободното возачко место имаат Данил Квјат и Пол ди Реста. Од тимот на Вилијамс се надеваат дека ќе ја објават возачката постава пред Божиќните празници.

Тимот јасно стави до знаење дека нивната тест програма е составена на тој начин за да даде конечен одговор за тоа дали Кубица е подготвен да направи кам-бек во Формула 1 Шампионатот, седум години по ужасната несреќа која ја прекина неговата кариера. Жан Тод, Претседателот на ФИА, изјави дека медицинските тестови на ФИА, дополнително ќе одредат дали Кубица е способен да се натпреварува.