ПИРЕЛИ: НАЈДОБРА СТРАТЕГИЈА ЗА ТРКАТА

Возачот на Мерцедес АМГ, Луис Хамилтон, го забележа најбрзото време на вчерашните квалификации и со тоа си обезбеди старт од првата позиција за денешната трка за Големата Награда на Штаерска, која се вози на истата патеката од минатиот викенд, Ред Бул Ринг.

Најбрзата стратегија за Големата Награда на Штаерска, која се состои од 71 круг е едно застанување во бокс, и тоа старт на црвените гуми со стинт од 28 до 33 круга, а потоа следува завршен стинт на белите гуми.

Квалификациите се одржаа на влажна патека, па сите возачи денес ќе имаат слободен избор на гуми со кои ќе ја стартуваат трката. Минатиот викенд, единствено Макс Ферстапен се реши за старт на жолтите гуми.

Втора најбрза стратегија е старт на жолтите гуми со стинт од 30-35 круга, за потоа да следува подолг завршен стинт на белите гуми. Според графиката на Пирели, вториот стинт е со црвени гуми, но ни изгледа невозможно да се прогнозира толку долг стинт на црвените, најмеки гуми.

Тука некаде, теоретски, е стратегијата со првичен стинт на црвени гуми од 24-30 круга, потоа да се оди на жолтите гуми до самиот финиш на трката.

Стратегија со две застанувања во бокс е дефинитивно многу побавна варијанта и треба да се избегнува, освен ако околностите на трката не ја направат неизбежна. Таа би се одвивала според следниот редослед: два стинта од по 24-26 круга на црвени гуми, а потоа завршеток на трката на жолти гуми.

Друг фактор кој се покажа како значаен на минатата трка е излегувањето на Безбедносниот автомобил, па тоа е нешто на што возачите ќе треба да внимаваат.

Марио Изола, Пирели: "Не беше лесна квалификациска сесија за возачите, без саботниот тренинг и нивно првично среќавање со гумите за влажно време на квалификациите, што доведе до неколку интересни изненадувања на гридот."

"Во овие непредвидливи и екстремни услови, тимовите и возачите требаше брзо да се прилагодат на променливите околности."

"Со квалификациите кои се одржаа само со сините гуми, вообичаеното правило дека првите 10 треба да ја започнат трката на гумите со кои го забележаа најбрзото време во Q2 не важи, така што секој возач има слободен избор, кој треба да отвори неколку различни можности за стратегија."

2020 АВСТРИЈА ГП - СТАРТЕН РЕДОСЛЕД
1. ЛУИС ХАМИЛТОН - МЕРЦЕДЕС АМГ
	2. МАКС ВЕРСТАПЕН - РЕД БУЛ
3. КАРЛОС САИНЦ ЈР. - МЕКЛАРЕН
	4. ВАЛТЕРИ БОТАС - МЕРЦЕДЕС АМГ
5. ЕСТЕБАН ОКОН - РЕНО
	6. АЛЕКС АЛБОН - РЕД БУЛ
7. ПЈЕР ГАСЛИ - АЛФАТАУРИ
	8. ДАНИЕЛ РИКИАРДО - РЕНО
9. ЛАНДО НОРИС - МЕКЛАРЕН*
	10. СЕБАСТИЈАН ВЕТЕЛ - ФЕРАРИ
11. ЏОРЏ РАСЕЛ - ВИЛИЈАМС
	12. ЛЕНС СТРОЛ - РЕЈСИНГ ПОИНТ
13. ДАНИЕЛ КВЈАТ - АЛФАТАУРИ
	14. ЧАРЛС ЛЕКЛЕР - ФЕРАРИ*
15. КЕВИН МАГНУСЕН - ХАС
	16. КИМИ РАИКОНЕН - АЛФА РОМЕО
17. СЕРЏО ПЕРЕЗ - РЕЈСИНГ ПОИНТ
	18. НИКОЛАС ЛАТИФИ - ВИЛИЈАМС
19. АНТОНИО ЏОВИНАЦИ - АЛФА РОМЕО
	20. РОМАН ГРОЖАН - ХАС
*казна од 3 места поназад @МкФормула1 - РЕПУБЛИКА МАКЕДОНИА @MkFormula1 - REPUBLIC OF MACEDONIA