НАЈАВА НА УНГАРСКОТО ГРАН ПРИ

Овој викенд следува Големата Награда на Унгарија, трета последователна трка на почетокот на 2020 сезоната. Се вози на Хунгароринг, патека домаќин од далечната 1986 година и опстојува веќе 34 години. Таа се рангира на третото место на листата на патеки кои биле домаќини на најмногу последователни Ф1 трки, а пред неа се само Монако и Монца.

На граѓаните на Велика Британија, поголемиот дел од вработените во тимовите, како и на граѓаните на земји надвор од ЕУ им беше дозволено, без задолжителниот двонеделен карантин, да бидат само на патеката или во хотел.

Забранети им се било какви други движења, за кои следува парична казна од 15.000 евра или затворска казна. Во Унгарија, коронавирус има мала стапка на распространетост, па властите сакаат така да остане и понатаму.

За разлика од Ред Бул Ринг, која иако кратка беше брза патека, сега следува борба на бавна, тесна и кривулеста патека. Тоа е најбавната постојана патека во календарот со просечна брзина од само 190 км/ч. Само уличните трки во Сингапур и Монако имаат понизок просек од Хунгароринг. Затоа тимовите ќе донесат аеродинамичен пакет со максимална потисна сила.

Со оглед на ревидираниот календар за оваа сезона, изгледа дека Хунгароринг ќе биде патеката со најголемо побарување на потисна сила. Болидите минуваат само околу 10 секунди возејќи во права линија, додека преостанатите 65 секунди или нешто повеќе низ свиоци.

Патеката е една од најтешките кога е во прашање ладењето на сопирачките, делумно заради недостаток на правци, и честопати се влошува кога болдите се заглавени во сообраќајот. Хунгаророинг има единаесет точки на сопирање, од кои три се класифицирани како тешки за сопирачките, една е со средна тежина и преостанатите седум се лесни.

Најоптоварувачка точка е влезот во првиот свиок по стартно/целниот правец, каде болидите се приближуваат со 340 км/ч и намалуваа на 109 км/ч во само 137 метри. Возачите притискаат 2.52 секунди на педалот на сопирачката со сила од 182кг и подлежат на забавување од 5.5Г

Хунгароринг е патека на која многу од Ф1 возачите ја забележале својата Прва Ф1 Победа, Фернандо Алонсо во 2003 година, Џенсон Батон во 2006 година. Дејмон Хил, исто така, ја забележа својата Прва Ф1 Победа во Унгарија, во болидот на Вилијамс, далечната 1993 година. Тој беше првиот син на светски шампион кој Победил на Ф1 трка.

Оптималниот аеродинамичен грип ќе биде резултат на подесувањата од страна на тимовите, но, овде голема улога игра механичкиот грип кој во голема мера ќе зависи од гумите на Пирели.

Изборот на гумите е ист како и претходните две трки во Австрија, од C2 смешата се произведени белите(тврди) гуми, C3 жолти(медиум) и C4 црвени(меки).

Ова не е единствената работа што останува иста, оваа година возачите имаат исти алокации, две комплети на бели гуми, три комплети жолти и осум комплети црвени.

Истите смеши беа номинирани и минатата година, бидејќи тие се добро прилагодени на карактеристиките на патеката. Менаџирањето и разбирањето на работата на гумите од Пирели ќе биде клучна задача за секој возач и тим во битката за што подобар пласман.

Патеката е физички напорна за возачите, кои често ја споредуваат со Сингапур (физички најнапорната патека во календарот), поради големиот број на свиоци, високите температури, и релативно малото воздушно струење низ болидот.

Хибридните погонски единци беа воведени во 2014 година, но тоа не е сезоната кога е забележана првата победа на Хибриден Ф1 болид. Тоа се случи на 2009 Унгарското ГП, сезона кога системите за обнова на кинетичка енергија (КЕРС) не беа задолжителни и победите на воведните трки ги забележаа болиди со конвенционални мотори.

Сепак, Мерцедес-Бенз разви хибриден систем, кој го употребуваше тимот на Мекларен. Значи, Победата на Луис Хамилтон на 2009 Унгарското ГП, одржана на 26 Јули, беше прва Победа за Хибриден болид во Формула 1.

ЛИНК

ДЕТАЛЕН ВРЕМЕНСКИ РАСПОРЕД

И КРАТКО ИНФО ЗА ПАТЕКАТА

ЛИНК

Првите две трки од 2020 сезоната јасно го означија усогласувањето на силите помеѓу Ф1 тимовите, Мерцедес АМГ е на врвот, останатите се аутсајдери. Ред Бул се надеваше дека ќе може да парира на црните болиди, но во Шпилберг само еднаш се искачија на подиумот, место каде Макс Ферстапен победуваше две години по ред.

Тимот на Мекларен има очигледен напредок, но особено е забележителен падот на перфоманси на Ферари. Италијанците ја започна сезоната во полоша форма од вообичаеното, а нивната брзина беше инфериорна не само кон лидерите, туку и болидите од средината на поредокот. Еден од проблемите на Ферари е недостигот на моќ од Ферари ПЕ, нешто што негативно влијаеше и на конкурентноста на нивните клиенти. Алфа Ромео, Хас, заедно со Вилијамс беа на дното од табелите.

Тимот на Рејсинг Поинт, со болид копија од ланскиот Мерцедес АМГ, потпомогнат со финансиите на Лоренс Строл, забележа значителен успех, користејќи го истиот пристап што доведе до првичниот успех на Хас.

RP20 се покажа брз и сигурен болид, предизвикувајќи ја љубомората на Рено, кој и по неколку сезони како фабрички тим не успеа да го постигне истото. Затоа по завршувањето на Штаерското ГП, тие поднесоа официјален приговор за дизајнот на воздушните канали на сопирачките на болидите на Рејсинг Поинт.

Според прописите, секој тим треба самостојно да ги осмислува и произведе овие делови од болидите, а Рено се сомнева дека тие го користат истото или мног слично решение на Мерцедес АМГ од минатата сезона. Во текот на наредните денови, ФИА ќе го разгледа овој приговор.

ВРЕМЕНСКА ПРОГНОЗА ЗА ВИКЕНДОТ
СЕСИЈА	ВРЕМЕ	ПРОГНОЗА
ТРЕНИНГ 1	11:00-12:30 MK	Облачно, грмотевици, 17/20°C
50% шанси за дожд
ТРЕНИНГ 2	15:00-16:30 MK	Наизменични облаци, 18/22°C
45% шанси за дожд
ТРЕНИНГ 3	12:00-13:00 MK	Наизменични облаци, 22/27°C
КВАЛИФИКАЦИИ	15:00-16:00 MK	Облачно, 23/24°C
34% шанси за дожд
ТРКА	15:10 MK	Делумно Сончево, 24/27°C
57% шанси за дожд
Извор: Accuweather
@МкФормула1 - РЕПУБЛИКА МАКЕДОНИЈА @MkFormula1 - REPUBLIC OF MACEDONIA