ОФИЦИЈАЛНО: ЗБОГУМ ОД ХАС ЗА МАГНУСЕН И ГРОЖАН

Рано утринава, Роман Грожан и Кевин Магнусен ја потврдија разделбата со тимот на Хас Ф1 на крајот од тековната 2020 сезона. Гунтер Штајнер, тимскиот шеф, им се заблагодари за нивната долгогодишната соработка. Според шпекулациите низ падокот возачката постава за следната сезона се очекува да биде објавена во наредните денови.

"Би сакал да им се заблагодарам на Роман и Кевин за напорната работа и посветеноста кон нашиот тим во текот на изминатите неколку сезони. Роман беше со нас од самиот почеток, сакавме веднаш да имаме искусен и брз возач. Неговите резултати на почетокот на 2016 година беа добра награда и за неговиот талент и за напорите на тимот. Кога Кевин се приклучи на тимот една година подоцна, забележавме поени со двата болида во Монако."

"Имаме многу убави спомени од соработката, вклучително и сезоната 2018, која ја завршивме на петтото место во шампионатот на конструктори. Роман и Кевин одиграа значајна улога во овој успех. 2020 сезоната нема да биде лесна за нас, но има уште многу трки пред нас, и не се сомневам дека тие ќе дадат се од себе до Големата Награда на Абу Даби во декември."

Кевин Магнусен: "Здраво на сите. 2020 сезоната ќе биде моја последна со Хас Ф1. Имав одлични четири години и со задоволство се сеќавам на нив. Не е лесно да се биде дел од целосно нов тим, но имав големо задоволство и многу искуство што ми овозможи да растам и да се развивам како возач. Сеуште работам на моите планови за понатаму, и ќе ги објавам кога ќе имам нешто конкретно. Остануваат уште 6 трки од оваа сезона, во кои ќе го дадам својот максимум."

Роман Грожан: "Напишано е последното поглавје, книгата е завршена. Со ХAС Ф1 сум од првиот ден. Пет години зад нас, во кои имавме успеси и неуспеси, на 92 трки забележавме 110 поени, но вредеше. Научив многу, станав подобар, како возач и како личност. Се надевам дека му помогнав на тимот да стане подобар. Јас сум дури и повеќе горд на ова од незаборавните први трки во 2016 година или Големата Награда на Австрија во 2018 година. На тимот му посакувам сè најдобро за во иднина."