ПЕРЕЗ И САИНЦ НАЈБРЗИ НА СТАРТОТ ВО МОНАКО

Серџо Перез го забележа најбрзото време на првата тренинг сесија за ГН на Монако. Сепак, и покрај фактот што имаше помош од црвените гуми на Пирели, ова треба да му даде поголема самодоверба во болидот на Ред Бул. Второ и трето најбрзо време за Карлос Саинц Јр. со Ферари и Макс Ферстапен во вториот болид на Ред Бул.

Сообраќајот предизвика доста проблеми, голем број возачи ги "бакнаа" бариерите покрај патеката, но, само Леклер имаше сериозни проблеми, кога поради проблем со менувачот мораше да ја заврши сесијата многу брзо, по само 4 круга на асфалтот.

Додека неговите проблеми продолжуваат на домашниот терен, неговиот тимски колега Карлос Саинц Јр. беше импресивен победувајќи ги возачите на Мерцедес АМГ и Ред Бул на жолтите гуми. Останува да видиме дали тоа беше поради разликата во гориво или едноставно улиците на Монте Карло му лежат на Шпанецот.

Тесната градска патека бара прецизност и самодоверба. Минатата година, трката во Монако не се одржа, па овој викенд имаме четворица возачи кои ќе дебитираат на истата, Николас Латифи, Никита Мазепин, Јуки Цунода и Мик Шумахер. Тројца од нив се тркаа во Монако во младинските серии, додека Јапонецот прв пат се среќава со асфалтот на оваа историска патека за Формула 1.

Казни за лимити на патеката има и во Монте Карло, па за време на Т1 сесијата, беа избришани 11 времиња за излегување надвор од патеката во 10-тиот свиок. Карлос Саинц Јр., Серџо Перез и Никита Мазепин имаа по два такви прекршоци.

Што се однесува до Мекларен, покрај новиот изглед, Ландо Норис со пласман во топ 10, но Рикиардо имаше многу тивка сесија. Попречен од сообраќајот, тој сигурно не го извлече максимумот од неговиот болид.

Но, веќе научивме дека тие во петок имаат тенденција да возат со "вреќи песок" на тренинг сесиите, па ќе да почекаме сабота за да ни покажат нивниот целосен потенцијал.

Вториот тренинг кој треба да ни донесе многу порелевантни резултати следува во 15:00 часот.

2021 МОНАКО ГП - ТРЕНИНГ 1
П.	ВОЗАЧ	ТИМ	ВРЕМЕ	РАЗЛИКА	КРУГ
1	Серџо Перез	Ред Бул	1:12.487		36
2	Карлос Саинц ЈР.	Ферари	1:12.606	+ 0.119	32
3	Макс Ферстапен	Ред Бул	1:12.648	+ 0.161	39
4	Пјер Гасли	АлфаТаури	1:12.929	+ 0.442	37
5	Луис Хамилтон	Мерцедес АМГ	1:12.995	+ 0.508	34
6	Валтери Ботас	Мерцедес АМГ	1:13.131	+ 0.644	36
7	Ландо Норис	Мекларен	1:13.236	+ 0.749	31
8	Себастијан Ветел	Астон Мартин	1:13.732	+ 1.245	33
9	Јуки Цунода	АлфаТаури	1:13.746	+ 1.259	39
10	Кими Раиконен	Алфа Ромео	1:14.081	+ 1.594	31
11	Ленс Строл	Астон Мартин	1:14.090	+ 1.603	33
12	Антонио Џовинаци	Алфа Ромео	1:14.106	+ 1.619	27
13	Фернандо Алонсо	Алпин	1:14.205	+ 1.718	37
14	Николас Латифи	Вилијамс	1:14.268	+ 1.781	41
15	Даниел Рикиардо	Мекларен	1:14.281	+ 1.794	36
16	Естебан Окон	Алпин	1:14.320	+ 1.833	37
17	Никита Мазепин	Хас	1:14.616	+ 2.129	33
18	Мик Шумахер	Хас	1:14.801	+ 2.314	35
19	Џорџ Расел	Вилијамс	1:14.840	+ 2.353	34
20	Чарлс Леклер	Ферари	1:19.618	+ 7.131	4
ИСТОРИЈА - ХИБРИДНА ЕРА - МОНТЕ КАРЛО 2014 Луис Хамилтон - Мерцедес АМГ - 1:18.271 2015 Луис Хамилтон - Мерцедес АМГ - 1:18.750 2016 Луис Хамилтон - Мерцедес АМГ - 1:15.537 2017 Луис Хамилтон - Мерцедес АМГ - 1:13.425 2018 Даниел Рикиардо - Ред Бул - 1:12.126 2019 Луис Хамилтон - Мерцедес АМГ - 1:12.106 2021 Серџо Перез - Ред Бул - 1:12.487
@МкФормула1 - Република Македонија @MkFormula1 - Republic of Macedonia