ФЕРАРИ НА ПРВИТЕ ДВЕ МЕСТА, НАЈБРЗ НА ТРЕНИНГ СЕСИИТЕ

Чарлс Леклер го пропушти првиот тренинг поради проблеми со менувачот, но механичарите на Ферари го заменија за попладневната сесија. Тоа не беше проблем за Моначанецот, па на домашен терен, го забележа најбрзото време потиснувајќи го Карлос Саинц Јр., својот тимски колега на второто место на табелата. 1-2 пласман за Ферари по подолго време. Трет најбрз беше Луис Хамилтон со болидот на Мерцедес АМГ.

Колку гориво имаше во болидите на Ферари е непознато, но и покрај тоа, без долги правци, што оди во прилог на послабата Ферари ПЕ, оваа патека се чини дека добро им одговара.

Под претпоставка дека забележаните времиња не биле на последните капки гориво и зголемена моќност на ПЕ, тие изгледаат прилично добро во Монте Карло. Сепак, тренинг сесиите се само тренинг сесии, она вистинското доаѓа во сабота и недела.

Програмата беше традиционална, пронаоѓање на оптималниот баланс на болидите. Возачите ја започнаа сесијата на жолтите гуми, а многумина се жалеа на недостаток од грип, за потоа да се префрлат на црвените гуми на Пирели, по што времињата започнаа значително да се намалуваат.

Како и утрото, имаше неколку инциденти. Дебитантот во Монако, Јуки Цунода, имаше блиска средба со бариерите, минимално го оштети болидот, успеа да стигне до својата гаража, но тоа беше крај на сесијата за него. Деловите за поправки биле складирани на друго место, а тимот ќе добие пристап до нив по завршувањето на сесијата.

Како најдобар од останатите беше Ландо Норис со Мекларен, десетинка пред Пјер Гасли со АлфаТаури. Што се однесува до Рикиардо, повторно со слаб пласман. За разлика од Шпанецот во Ферари, тој едноставно изгледа дека ги нема истите нивоа на доверба во својот болид, кои што ги имаше во Ред Бул и Рено. Тој има дополнителен ден да ги спореди податоците и да види дали може да дојде до темпото на неговиот тимски колега.

За разлика од предпладневната сесија, Серџо Перез не можеше повеќе од осмото место на табелата, па и тој, како и Австралијанецот, треба да најде нешто специјално ако сака да биде на една од првите стартни позиции. Антонио Џовинаци и Себастијан Ветел го заокружија Топ 10 пласманот, со Кими Раиконен на П11, не многу далеку од нив.

Во 52-та минута, Мик Шумахер имаше судир со бариерите покрај третиот свиок, по што заработи дупната десна задна гума и оштетена амортизација, се обиде полека да стигне до боксот, но не успеа во тоа, по што беше приморан да го запре болидот на излез од тунелот.

Сесијата беше прекината за отстранување на остатоците и евакуација на неговиот болид. Со оглед што црвените знамиња беа развеани на 4 минути до крајот на тренингот, контролата на трката одлучи тоа да биде неговиот крај.

Имавме 27 избришани времиња поради излегување надвор од патеката во 10-тиот свиок, од кои најмногу беа на Луис Хамилтон, 5. За прв пат оваа година, Никита Мазепин го победи Мик Шумахер на двете трениг сесии.

Денес во Монте Карло беше топло, температурата на патеката има клучно влијание врз абењето и деградирањето на гумите, но и во такви услови, тие се покажаа доста ниски.

Ова сугерира дека во недела тимовите ќе ја изберат стратегијата со едно влегување во бокс, претпочитајќи да ги користат црвените и жолтите гуми.

Условите може да се променат до сабота, поради фактот што временската прогнозата најавува слаб дожд пред третиот тренинг, што ќе влијае на состојбата на асфалтот.

Квалификациите во сабота се закажани за 15:00 часот по наше време.

2021 МОНАКО ГП - ТРЕНИНГ 2
П.	ВОЗАЧ	ТИМ	ВРЕМЕ	РАЗЛИКА	КРУГ
1	Чарлс Леклер	Ферари	1:11.684		30
2	Карлос Саинц ЈР.	Ферари	1:11.796	+ 0.112	31
3	Луис Хамилтон	Мерцедес АМГ	1:12.074	+ 0.390	28
4	Макс Ферстапен	Ред Бул	1:12.081	+ 0.397	27
5	Валтери Ботас	Мерцедес АМГ	1:12.107	+ 0.423	32
6	Ландо Норис	Мекларен	1:12.379	+ 0.695	24
7	Пјер Гасли	АлфаТаури	1:12.498	+ 0.814	28
8	Серџо Перез	Ред Бул	1:12.708	+ 1.024	24
9	Антонио Џовинаци	Алфа Ромео	1:12.746	+ 1.062	28
10	Себастијан Ветел	Астон Мартин	1:12.982	+ 1.298	26
11	Кими Раиконен	Алфа Ромео	1:13.065	+ 1.381	31
12	Фернандо Алонсо	Алпин	1:13.175	+ 1.491	27
13	Ленс Строл	Астон Мартин	1:13.195	+ 1.511	26
14	Естебан Окон	Алпин	1:13.199	+ 1.515	28
15	Даниел Рикиардо	Мекларен	1:13.257	+ 1.573	26
16	Џорџ Расел	Вилијамс	1:13.509	+ 1.825	32
17	Николас Латифи	Вилијамс	1:13.593	+ 1.909	31
18	Никита Мазепин	Хас	1:14.407	+ 2.723	26
19	Мик Шумахер	Хас	1:14.416	+ 2.732	25
20	Јуки Цунода	АлфаТаури	1:14.829	+ 3.145	11
ИСТОРИЈА - ХИБРИДНА ЕРА - МОНТЕ КАРЛО 2014 Фернандо Алонсо - Ферари - 1:18.842 2015 Луис Хамилтон - Мерцедес АМГ - 1:17.192 2016 Даниел Рикиардо - Ред Бул - 1:14.607 2017 Себастијан Ветел - Ферари - 1:12.720 2018 Даниел Рикиардо - Ред Бул - 1:11.841 2019 Луис Хамилтон - Мерцедес АМГ - 1:11.118 2021 Чарлс Леклер - Ферари - 1:11.684
@МкФормула1 - Република Македонија @MkFormula1 - Republic of Macedonia