РЕД БУЛ НАЈБРЗ НА БЕЗНАЧАЈНИОТ ПРВ ТРЕНИНГ

Макс Ферстапен го имаше најбрзото време на првиот тренинг за Големата Награда на Катар и беше речиси половина секунда побрз Пјер Гасли и Валтери Ботас.

Луис Хамилтон, ривал за титулата на Макс Ферстапен го имаше четвртото најбрзо време, но не ризикуваше премногу на патеката, на тренинг кој не е од поголемо значење.

Асфалтот на патеката Лосаил надмина 40 степени, но тимовите се решија да им приредат доволно акција на своите возачи, на која мнозинството од нив ќе возат за прв пат во нивната кариера. Единствено Серџо Перез има настап на оваа патека во јуниор категориите.

Рекордот на патеката поставен во 2009 година од Нико Хулкенберг на трка од ГП2 шампионатот беше подобрен веќе во првите минути и тоа веднаш за десет секунди.

Имаше минимални инциденти. Мазепин, Расел, Раиконен, Алонсо и Саинц Јр. имаа излетување надвор од патеката без последици по нивните болиди. Во последните минути Мик Шумахер влета во чакал во седмиот свиок, но успеа да се врати на патеката и да дојде до својата гаража.

Ленс Строл имаше предвремен крај на сесијата поради проблеми со хидрауликата, неговиот болидот застана на почетокот на пит-линијата и механичарите мораа да го вратат назад во гаражата.

Неколку возачи имаа оштетувања на предното крило по возењето над рабниците покрај патеката, еден од нив беше и Луис Хамилтон. Штетите од таквото возење ги почувствува и Ландо Норис.

Температурните разлики помеѓу денските и ноќните сесии ќе бидат значителни, па затоа многу порелевантни податоци ќе дознаеме на вториот тренинг, кој е закажан за 15:00 часот, време кога ќе се одржат квалификациите и неделната трка.

2021 КАТАР ГП - ТРЕНИНГ 1
П.	ВОЗАЧ	ТИМ	ВРЕМЕ	РАЗЛИКА	КРУГ
1	Макс Ферстапен	Ред Бул	1:23.723		22
2	Пјер Гасли	АлфаТаури	1:24.160	+ 0.437	28
3	Валтери Ботас	Мерцедес АМГ	1:24.194	+ 0.471	24
4	Луис Хамилтон	Мерцедес АМГ	1:24.509	+ 0.786	21
5	Јуки Цунода	АлфаТаури	1:24.648	+ 0.925	27
6	Карлос Саинц Јр.	Ферари	1:24.915	+ 0.990	26
7	Чарлс Леклер	Ферари	1:24.921	+ 1.067	27
8	Серџо Перез	Ред Бул	1:24.972	+ 1.192	22
9	Естебан Окон	Алпин	1:25.215	+ 1.249	23
10	Ландо Норис	Мекларен	1:25.285	+ 1.492	19
11	Даниел Рикиардо	Мекларен	1:25.291	+ 1.568	24
12	Себастијан Ветел	Астон Мартин	1:25.328	+ 1.605	19
13	Николас Латифи	Вилијамс	1:25.688	+ 1.965	24
14	Антонио Џовинаци	Алфа Ромео	1:25.757	+ 2.034	23
15	Кими Раиконен	Алфа Ромео	1:25.828	+ 2.105	25
16	Џорџ Расел	Вилијамс	1:25.871	+ 2.148	24
17	Фернандо Алонсо	Алпин	1:25.905	+ 2.182	21
18	Мик Шумахер	Хас	1:26.699	+ 2.976	21
19	Ленс Строл	Астон Мартин	1:26.712	+ 2.989	11
20	Никита Мазепин	Хас	1:27.500	+ 3.777	16
ХИБРИДНА ЕРА - ЛОСАИЛ 2021 Макс Ферстапен - Ред Бул - 1:23.723 @МкФормула1 - Република Македонија @MkFormula1 - Republic of Macedonia