МЕРЦЕДЕС ПОВТОРНО БРЗ, МОЖЕ ЛИ РЕД БУЛ ДА ПАРИРА?!?

Луис Хамилтон повторно на врвот на табелата, пред Валтери Ботас и Пјер Гасли. Ферстапен не заостануваше премногу на четвртото место, но многу малку возачи добија чист круг на црвените гуми, премногу гужва на патеката.

Во Џеда е тесно, а сообраќајот е секогаш проблем на уличните патеки. Но, поради различните брзини помеѓу возачите што се во брз круг и некој што се обидува да се тргне од пато, а разликата е огромна, утре може да имаме интересни ситуации помеѓу возачите.

Градските патеки не простуваат ни најмали грешки, а тоа на своја кожа го почувствува Чарлс Леклер, кој беше првиот возач кој имаше поголем инцидент. Губејќи го задниот дел од неговиот SF21, тој заврши во бариерите со прилично силен удар. Се надеваме дека тој возеше со "петочен" менувач, а механичарите на Ферари ќе имаат полни раце работа.

Мерцедес АМГ изгледа побрз на најмеката црвена гума, Ред Бул изгледа удобно на жолтите и бели гуми. Двајцата ривали за титулата ќе треба да ги отстранат сите слабости, со само еден тренинг пред почетокот на утрешните квалификации, кои веројатно ќе бидат клучни за исходот на трката. Во моментов предноста е кај Мерцедес АМГ.

Во Џеда, разликата во температурата на воздухот и патеката на двата петочни тренинзи не беше толку голема како на другите патеки, каде што трката се вози по зајдисонце. Возачите се фокусираа на гумите на Пирели, оценувајќи го абењето и деградацијата, прво на потврдите смеши, во подолги стинтови, а потоа на помеките.

Многу возачи го изгребаа подот на своите болиди минувајќи врз рабниците на свиокот 11, но тоа не доведе до сериозни оштетувања, како пред две недели во Катар. На средина од тренинг сесијата Шумахер удри со десните тркала во заштитните бариери, но без последици по болидот. Мазепин се изврте во вториот свиок, по што тој продолжи да вози.

Како што напоменавме тренингот имаше предвремен крај поради црвените знамиња, кои беа развеани на четири минути пред крајот, кога Леклер го уништи својот болид. Моначанецот сам излезе од ферарито, се извини на својот тим, но штетата е сериозна.

Исто така, тој беше испратен на превентивен преглед во медицинскиот центар, а стјуардите одлучија тренингот да не продолжи. Со тоа возачите останаа без шанси за вежбање на старт процедурите, што стандардно се одвиваат на крајот од секоја тренинг сесија.

2021 ГН САУДИСКА АРАБИЈА - ТРЕНИНГ 2
П.	ВОЗАЧ	ТИМ	ВРЕМЕ	РАЗЛИКА	КРУГ
1	Луис Хамилтон	Мерцедес АМГ	1:29.018		22
2	Валтери Ботас	Мерцедес АМГ	1:29.079	+ 0.061	23
3	Пјер Гасли	АлфаТаури	1:29.099	+ 0.081	22
4	Макс Ферстапен	Ред Бул	1:29.215	+ 0.195	20
5	Фернандо Алонсо	Алпин	1:29.441	+ 0.423	21
6	Естебан Окон	Алпин	1:29.555	+ 0.537	22
7	Карлос Саинц Јр	Ферари	1:29.589	+ 0.571	24
8	Јуки Цунода	АлфаТаури	1:29.597	+ 0.579	20
9	Серџо Перез	Ред Бул	1:29.768	+ 0.750	22
10	Чарлс Леклер	Ферари	1:29.772	+ 0.754	23
11	Даниел Рикиардо	Мекларен	1:29.968	+ 0.950	22
12	Ландо Норис	Мекларен	1:30.004	+ 0.986	19
13	Антонио Џовинаци.	Алфа Ромео	1:30.110	+ 1.092	23
14	Кими Раиконен	Алфа Ромео	1:30.276	+ 1.258	24
15	Ленс Строл	Астон Мартин	1:30.442	+ 1.424	22
16	Себастијан Ветел	Астон Мартин	1:30.502	+ 1.484	21
17	Џорџ Расел	Вилијамс	1:30.506	+ 1.488	24
18	Мик Шумахер	Хас	1:30.652	+ 1.634	20
19	Николас Латифи	Вилијамс	1:31.039	+ 2.021	23
20	Никита Мазепин	Хас	1:31.629	+ 2.611	20
ХИБРИДНА ЕРА - ЏЕДА 2021 Луис Хамилтон - Мерцедес АМГ - 1:29.018 @МкФормула1 - Република Македонија @MkFormula1 - Republic of Macedonia