Ред Бул е единствениот тим што го надминал буџетот, иако тоа е "мало" прекршување, што значи трошење повеќе од поставените 145 милиони, но помалку од 5% од нив. Покрај тоа, австрискиот тим исто така ја прекрши процедурата.
Астон Мартин исто така беше во центарот на гласините за надминување на лимитот, но ФИА објави дека британскиот тим направил само една неправилност во постапката во согласност со финансиските регулативи, но не откри која.
Вилијамс, од своја страна, не ја почитуваше процедурата со тоа што не ги достави своите сметки навреме, но овој прекршокот е веќе решен со парична казна за тимот на Гроув.
Во моментов, ФИА само објави кои тимови направиле прекршок во однос на лимитот на буџетот за 2021 година, па не се знае какви санкции ќе има.
"Прегледот на поднесената документација беше интензивен и темелен процес, а сите тимови дадоа целосна поддршка во обезбедувањето информации потребни за проценка на нивната финансиска состојба во текот на оваа прва година од Финансиските регулативи. ФИА забележува дека сите тимови, во секое време, постапуваа во дух на добра волја и соработка во текот на целиот процес."
"Администрацијата за ограничување на трошоците на ФИА во моментов го одредува соодветниот курс на дејствување што треба да се преземе според финансиските регулативи во однос на Ред Бул и Астон Мартин и дополнителни информации ќе бидат доставени во согласност со регулативите."
РЕАКЦИЈАТА НА РЕД БУЛ
Ред Бул веднаш реагираа на соопштението на ФИА. Австрискиот тим тврди дека е "изненаден" и "разочаран" од наодот на Федерацијата дека тие ја надминале буџетската граница.
"Ги забележавме наодите на ФИА за "мало прекршување на буџетската граница" со изненадување и разочарување. Нашиот поднесок за 2021 година беше под ограничувањето на трошоците, така што треба внимателно да ги разгледаме наодите на ФИА."
"И покрај изјавите и верзиите на другите тимови, ние со почит ги следиме барањата на финансиските регулативи, додека ги разгледуваме сите достапни опции за одбрана на нашата позиција."
РЕЗИМЕ: Во извештајот на ФИА се вели дека пречекорување на трошоците навистина бил утврдено, но тоа било од незначителна природа. Следствено, не треба да се очекуваат страшни казни, но интригата сепак останува како дамка во работењето на ФИА кои дозволија многу шпекулации и протекување на информации.
Понатаму, Федерацијата избра да не дава детални информации за природата на прекршувањата. Буџетите на тимовите во 2021 година беа ограничени на 145 милиони долари за прв пат, плус беше направен додаток за дополнителни трошоци поврзани со спринт викендите.
Вилијамс стана првиот тим кој направил прекршок, но тој не бил од финансиска природа. Тимот едноставно доцна ја доставил потребната документација, поради што е казнет со 25.000 долари.
Пречекорувањето на трошоците извршено од Ред Бул е многу посериозен случај. Иако финансиските регулативи ги делат овие типови прекршувања во две категории, „големи“ и „помали“, претставниците на Мерцедес АМГ и Ферари за време на викендот во Сингапур рекоа дека ова е погрешна терминологија која не ја зема предвид предноста што тимот може да ја добие од секое дополнително трошење.
Како и да е, ФИА вети дека ќе објави дополнителни информации по одредено време, кои треба да разјаснат нешто, а дотогаш нивните ривали ќе ја притискаат ФИА, и ќе ги "рчкаат" Ф1 фановите. На крај тие ќе бидат изненадени и разочарани од ФИА. Федерацијата сама си е виновна за реномето што ја следи со нејзината нерешителност и зависност од големите Ф1 тимови.
