ОФИЦИЈАЛНО: АУДИ НАЈАВИ КУПУВАЊЕ НА ЗАУБЕР

Она што со месеци беше јавна тајна стана официјално оваа среда, 26 октомври 2022 година. Германскиот бренд потврди дека нивниот влез во Формула 1 ќе биде преку здружување со Заубер, кој моментално се натпреварува под името на главниот спонзор, Алфа Ромео.

Денеска се навршуваат точно два месеца од објавата на Ауди во СПА-Франкоршамп, во која го потврди влезот во Формула 1. Утрово го објави следниот голем чекор во својот проект, стратегиско партнерство со Заубер.

Тоа ќе биде етапно купување во кое Ауди ќе купи 75% од Заубер. Мора да се запомни дека Групацијата сè уште е под спонзорство на Алфа Ромео до крајот на 2023 година. Дури подоцна Ауди ќе има моќ да го преименува.

Погонската единица ќе биде создадена во Центарот за компетентност за мотори на Ауди во Нојбург, додека Заубер ќе го развива и произведува болидот во својата база во Хинвил (Швајцарија). Заубер исто така ќе биде одговорен за планирање и извршување на сите функции на тимот во однос на шампионатот и учество на трките.

"Среќни сме што добивме толку искусен и компетентен партнер за нашиот амбициозен проект во Формула 1", изјави Оливер Хофман, член на Одборот за технички развој во Ауди. "Веќе ја познаваме Заубер Групацијата со нејзиниот најсовремен капацитет и искусен тим од претходните соработки и убедени сме дека заедно ќе формираме силен тим."

"На пример, Ауди Спорт редовно го користеше високотехнолошкиот воздушен тунел на групацијата Заубер во Хинвил, оддалечен нешто помалку од четири часа со автомобил, за време на успешната ера на Ле Ман и за време на развојот на ДТМ автомобилот од класата 1."

"Ауди е најдобриот партнер за Заубер групацијата", вели Фин Раусинг, претседател на Заубер Холдинг. "Јасно е дека двете компании споделуваат исти вредности и визија. Со нетрпение очекуваме да ги постигнеме нашите заеднички цели со силно и успешно партнерство."

Развојот на погонската единица се одвива со полна пареа во објектот на специјално основаната подружница Audi Formula Racing GmbH во Нојбург. На проектот веќе работат повеќе од 120 вработени.

"Заубер е првокласен партнер за користење на Ауди ПЕ", вели Адам Бејкер, управен директор на компанијата. "Со нетрпение очекуваме да работиме со искусен тим кој помогна да се обликуваат многу епохи од историјата на Формула 1. Заедно, сакаме да го напишеме следното поглавје, почнувајќи од 2026 година."

Распоредот до првата трка со учество на Ауди во сезоната 2026 е амбициозен: проширување на објектот во Нојбург во однос на персоналот, нови згради и техничка инфраструктура, што во голема мера треба да биде направено во 2023 година. Првите тестови со погонската единица развиена според прописите од 2026 година се планирани за 2025 година.

Со новата регулатива, Формула 1 прави голем чекор кон одржливост. Ова беше важен предуслов за Ауди да одлучи да влезе во шампионатот. Погонските единици ќе бидат поефикасни отколку што се денес, бидејќи процентот на електричниот дел значително ќе се зголеми.

Во 2026 година хибридниот дел ќе има речиси исто толку моќност како моторот, и ќе достигнува до 400 kW (544 КС). Високо ефикасните 1.6-литарски турбо мотори ќе се напојуваат со синтетичко гориво кое ќе биде CO2 неутрално.

Формула 1, исто така, си постави за цел да биде CO2 неутралнa како тркачка серија до 2030 година.