СЕРЏО ПЕРЕЗ НАЈБРЗ, ФЕРНАНДО АЛОНСО ГИ РАЗДЕЛИ ВОЗАЧИТЕ НА РЕД БУЛ

Три тест дена се многу малку за претсезона во Формула 1, и затоа првата тренинг сесија во Бахреин имаше одредена точка на континуитет во однос на она што беше доживеано минатата недела на истата патека.

Многу сензори, многу радио пораки и општиот впечаток дека овие први 60 минути повеќе служеа за да се потврди работата на тестовите отколку да се дознае поредокот на тимовите.

Дополнето што овие услови на патеката не се ни во близина на условите кои ќе бидат достапни за квалификациите и неделната трка. Затоа очекуваме многу повеќе од вториот тренинг, кој на програмата е во 16:00 часот.

Првата тренинг сесија заврши со Серџо Перез и Ред Бул на врвот на табелата и Астон Мартин кој успева да се одржи при врвот, чекајќи да открие утре на квалификациите дали нивните перфоманси се вистински или нивните ривали сè уште не ги покажале своите карти.

Фернандо Алонсо заостана четири десетинки од најбрзото време и успеа да се пласира меѓу Серџо Перез и Макс Ферстапен. Двата Ред Була ги забележаа своите времиња половина час по почетокот на сесијата, додека Фернандо Алонсо го забележа своето време 20 минути подоцна, во последните моменти пред финишот.

Највпечатлива новина на оваа тренинг сесија беше дебито на розовото обојување на Алпин A523. Како и минатата година, тимот од Енстоун ќе се натпреварува на првите три трки од календарот со карактеристичната боја на својот спонзор BWT, за потоа да се врати во сината што доминираше на претсезонската тест сесија.

Дебитираше и Ленс Строл, кој го пропушти минатонеделното тестирање поради велосипедска несреќа. Канаѓанецот пристигна во Бахреин директно од базата на Астон Мартин во Силверстоун, каде што беше тестиран во симулаторот за да се потврди дека е подготвен.

За негова несреќа, неговиот болид имаше проблеми со палењето, што го чинеше 20 минути од сесијата, период кој му беше повеќе од потребен за адаптација на новиот болид.

Сесија во која теоретските ривали на Ред Бул допрва треба да се покажат. Многу се очекуваше од Ферари, за кои се верува дека се на повисоко ниво од минатата година, но она што се виде утрово не е охрабрувачко.

Чарлс Леклер имаше проблеми со вибрациите на задното крило и тимот мораше да ги направи потребните прилагодувања, додека Карлос Саинц Јр. се изврте, поради вертикалните осцилации, на влез во десеттиот свиок.

Сепак, да не избрзуваме со некакви заклучоци, и да го почекаме вториот тренинг. Ниту Саинц Јр., ниту Леклер не ги користеа црвените гуми за брз круг, така што нивните времиња се забележани на жолтите гуми.

Моначанецот беше петти, секунда и пол зад најбрзото време, што кога ќе се корегира поради различните смеши, би требало да биде веднаш зад Ред Бул. Но, прашање е колку форсираа и од тимот на Ред Бул. Карлос Саинц Јр., при извртувањето можеби го оштети и подот на својот болид, што може да има последици во време на ограничен буџет.

Двата возачи на Мерцедес АМГ, со Луис Хамилтон на десеттото и Џорџ Расел на единаесеттото место, исто така ги избегнаа црвените гуми при својот најбрз круг. Сето ова значи дека вториот тренинг ќе биде уште поважен, бидејќи дури тогаш овие два тима конечно ќе ја покажат својата брзина на побрзата гума на Пирели.

Тренинг 2 сесијата која започнува во 16:00 часот, ќе биде можност да откријат колку се далеку од Ред Бул и, пред се, дали се способни да се вратат на местото каде што треба или Астон Мартин ќе успее да го продолжи сонот уште еден ден.