Презентацијата ќе се одржи на 18 февруари во Лондон во познатиот забавен комплекс The O2 Arena, едно од најдобрите концертни места во Велика Британија.
Сите тимови, нивните возачи и тимски шефови ќе се соберат на едно место и ќе го претстават изгледот на своите болиди на фановите.
Формула 1, во соопштението за медиумите, најавува дека публиката која ќе се собере на трибините на О2 и фановите кои ќе ја следат презентацијата онлајн ќе ги видат само нови верзии на боите на болидите.
Презентацијата ќе трае два часа, со почеток во 21:00 часот по македонско време, а ќе ја продуцира Брајан Бурк, познат по неговите спектакуларни шоуа, од кои многу се одржаа во Лас Вегас, вклучително и режијата на минатогодишната церемонија на отворање за дебито на Големата Награда на Лас Вегас.
Продажбата на билетите за февруарската презентација ќе започне на 15 ноември, а нивната цена ќе се движи од 58 до 113 фунти.
Стефано Доменикали, Претседател и извршен директор на Формула 1: "За прв пат, на едно место ќе ги собереме нашите фанови, 20 суперѕвезди на нашиот спорт и голем број специјални гости официјално да ја отворат новата сезона и да ја одбележиме 75-годишнината од нашиот шампионат."
"По драматичните настани од сезоната 2024, следниот шампионат исто така ветува дека ќе испише историја, а фановите од сите возрасти ќе можат да го доживеат одблиску неверојатниот забавен спектакл каков што е Формула 1."
Мохамед бин Сулејем, Претседател на ФИА: "Федерацијата е задоволна што им се придружува на нашите колеги од ФОМ и на сите тимови во заедничкото отворањето на сезоната, за прв пат во овој формат. Овој настан, исто така, ќе биде соодветна увертира за сите прослави на 75-годишнината на Формула 1 што ќе се одржуваат во текот на 2025 година."
