Сè започна со видео за историјата на Хонда во Формула 1, по што Тошихиро Мибе, извршниот директор на компанијата, им се обрати на присутните во салата и на публиката што гледаше онлајн.
Додека го држеше својот говор, кој беше придружен со слајдшоу за новиот проект на јапонскиот автомобилски гигант, на сцената се појави погонската единица на Хонда, а потоа и изложбен болид на Астон Мартин, без рекламни стикери, но имаше голем натпис "Powered by Honda" на капакот над моторот.
Најновата Ф1 погонска единица на Хонда ќе ја носи ознаката RA626H.
Целите на тимот се јасни: "Да победуваме на трки и да освојуваме титули."
Формула 1 влегува во непозната територија, бидејќи прописите се целосно променети и за болидите и за погонските единици. Тоа е нешто што повторно го привлече вниманието на Хонда, која официјално ја напушти Формула 1 на крајот од 2021 година, иако продолжи да обезбедува техничка поддршка на Ред Бул до минатата година.
Адриан Њуи го води проектот, а тимот се гордее и со големи имиња како Енди Кауел и Енрико Кардиле. Со оглед на оваа ситуација, тимот има големи очекувања.
"Не можам да замислам подобар партнер покрај мене. Астон Мартин и Хонда делат вредности. Двете компании се посветени на стремеж кон совршенство, а тоа значи освојување на трки и титули. Да се стане фабрички тим е возбудливо", коментираше Лоренс Строл, сопственикот на Астон Мартин.
Енди Кауел, кој беше тимски шеф до крајот на ноември, а потоа беше преместен, исто така јасно стави до знаење дека главната цел на ова партнерство е да се победува, иако е свесен и за предизвиците со кои ќе се соочат за да го достигнат врвот.
"Мислам дека ова ќе биде еден од највозбудливите стартови во последните 10 или 20 години. Во моментов се одвиваат огромни количини на развојни тестирања во Силверстоун, а исто така и во Сакура. Си поставивме тешки цели и сме навистина возбудени поради ова партнерство."
"Со овие цели, сакаме да победуваме, но разбираме дека Ф1 е тешка и предизвикувачка. Мора да се фокусираме на нашите проблеми, а ние работиме напорно на сите прашања што треба да ги решиме."
"Заминуваме во Барселона за да ги видиме потенцијалите на новиот болид, а исто така и во Бахреин. Ова е возбудливо време за инженерскиот тим."
Од друга страна, Хонда беше малку повнимателна, иако исто така јасно стави до знаење дека работи напорно и сака да биде подготвена за сè.
"Хонда ја гледа Ф1 како симбол на предизвици и иновации, а HRC, глобалниот оддел на Хонда за мотоспорт, го разви RA626H за да ги задоволи овие предизвици. Во својата потрага да стане број еден во светот, Хонда ќе продолжи да се справува со предизвиците заедно со тимот на Астон Мартин", рече Тошихиро Мибе, извршен директор на Хонда.
"Тешко е и предизвикувачки, но затоа сакаме да се справиме на вистинскиот начин. Во Сакура моментално се работи со полна пареа, затоа што сакаме да бидеме сигурни дека сме целосно подготвени за овој предизвик.", додаде Коџи Ватанабе, претседател на HRC.
Јапонците јавно признаа дека враќањето како производител на погонски единици во 2026 година нема да биде без технички ризици, особено во почетната фаза од новите регулативи.
Регулаторните промени за 2026 година воведуваат високо ниво на технички барања, како во електричната интеграција, така и во развојот на моторот со внатрешно согорување, област каде што Хонда признава дека сè уште ги нема сите одговори.
Минатото искуство силно влијае врз меморијата на компанијата.
Нејзиното претходно враќање во Формула 1, заедно со Мекларен во 2015 година, беше нарушено од стратешки грешки и недостаток на конкурентност што доведе до рано разделување.
Сега, со Астон Мартин како нов стратешки партнер, Хонда се обидува да избегне повторување на тоа сценарио, иако признава дека ризикот останува.
Во Хонда признаваат дека нивното враќање ќе биде сè освен лесно. Партнерството со Астон Мартин е долгорочно, но иако сите очекуваат чуда, барем на почетокот, конкурентноста можеби нема да биде загарантирана.
По презентацијата на која присуствуваше и Стефано Доменикали, интересно, на истиот ден со презентацијата на Ауди, следниот чекор на Астон Мартин и Хонда ќе биде тест сесијата во Барселона, кој ќе се одржи од 26 до 30 јануари.
Официјалната презентација на тимот е закажана за 9 февруари.
