ТЕСТ НА МЛАДИ ВОЗАЧИ, КЕВИН МАГНУСЕН СО МЕКЛАРЕН НАЈБРЗ

Денес започна првиот ден од последниот тест за млади возачи, кој се одржува во Абу Даби на патеката Јас Марина. Најбрзото време го имаше Кевин Магнусен со болидот на Мекларен MP4/27. Веднаш зад него се пласираше Антонио Феликс да Коста со болидот на Ред Бул, а трет најбрз беше Гери Пафет, кој го замени Кевин Магнусен по паузата за ручек во болидот на Мекларен.

Иако тестот се вика тест за млади возачи тимовите не пропуштија шанса да работат на своите болиди. Можеби најголемото изненадување е појавата на пасивен двоен ДРС-систем на болидот на Заубер. Тој е сличен на оној на Мерцедес АМГ. Видовме повторно доста низи со сензори на болидите на Ред Бул, Лотус и Заубер. Мекларен, пак, имаше распоредени камери на носот на болидот, кои го снимаа предното крило и предните гуми.

На крајот од тестот Луис Рациа предизвика црвено знаме, но тој сепак успеа да се врати во боксот без помош на крановите.

 П.     ВОЗАЧ                   ТИМ     БОЛИД     ВРЕМЕ    РАЗЛИКА КРУГОВИ
 1. Кевин Магнусен            Мекларен  MP4-27   1:42.651            40
 2. Антонио Феликс да Коста   Ред Бул   RB8      1:42.717  + 0.066   79
 3. Гери Пафет                Мекларен  MP4-27   1:43.407  + 0.756   44
 4. Робин Фријнс              Заубер    C31      1:43.775  + 1.124   78
 5. Никола Прост              Лотус     E20      1:44.194  + 1.543   55
 6. Луис Рациа                Торо Росо STR7     1:44.691  + 2.040   67
 7. Гидо Ван Де Гард          Катерам   CT01     1:45.936  + 3.285   57