Ерик Булие, тркачкиот директор на Мекларен вели дека она што му оставило впечаток е формата на Ферари, секако покрај проблематичниот почеток за новата погонска единица на Хонда.
Кога новинарите го запрашаа какви се перформансите на нивните ривали, Булие се пошегува: "Па, тие се малку побрзи од нас... Очигледно, во овој момент тоа е тешко да се каже, затоа што не го знаеме нивото на гориво, а особено нивото на моќноста на моторот, за колку проценти е намалена, кај секој од тимовите."
"Но, можам да кажам, Ферари е изненадувањето на оваа сесија и повеќето луѓе не очекуваа тие да ги следат времињата на Мерцедес АМГ. Ред Бул се малку надвор од форма, но, како што напоменав никогаш не се знае нивото на гориво."
"Секој има свои тајни, сите ги менуваат плановите, па дури и инженерите во самите тимови се обидуваат да дознаат кој до каде е и кој што прави. Тоа не е лесно. Следната тест сесија би требало да ни открие малку повеќе за перформансите, но, дефинитивно ќе треба да почекаме до Австралија."
