ФЕРАРИ: РАЗОЧАРУВАЧКИОТ РЕЗУЛТАТ ЈА ОДРАЗУВА НАШАТА ФОРМА

По завршување на тест сесиите во Барселона, резултатите на Ферари не навестуваа ништо добро за нивните фанови, но повеќето аналитичари до почетокот на сезоната веруваа дека не може до толку да се слаби, туку дека кријат некој адут.

Денешните квалификации со сигурност ни потврдија дека тие се послаби и отколку што можеше да се очекува. Чарлс Леклер успеа да се пласира во Q3 и беше седми најбрз возач, додека Себастијан Ветел не можеше да ја помине Q2 сесијата и утрешната трка ќе ја започне од 11-тата стартна позиција.

Чарлс Леклер, П7: "Седмото место е најдоброто што можевме да го направиме денес. Секако дека не сме таму каде што сакаме да бидеме, но едноставно не сме доволно брзи. Беше тежок ден, но барем сега знаеме каде сме. Како тим она што можеме да направиме е да не се предадеме, иако тоа не е лесно."

"Треба да работиме, сите заедно, на конструктивен начин и да се обидеме да направиме најдобра можна работа за да ги подобриме работите во следните неколку трки. Ние не треба да потонеме, туку мора да бидеме мотивирани и да работиме напорно за да се подобриме."

"Toa е единствениот пат кон успехот, за да се извлечеме од овие тешки времиња. Балансот на болидот е доста добар, но вкупната изведба сè уште не е доволно добра. Што се однесува до трката, сè може да се случи и потребно е да имаме добра стратегија со правилно менаџирање на гуми, па можеби можеме да забележиме добри поени."

Себастијан Ветел, П11: "Не се чувствував сигурен во болидот кон крајот на сесијата, но трката е утре и тоа е делот од викендот што најмногу го очекуваме. Значи, ќе видиме што можеме да научиме од денес да го подобриме за утре. Нашиот болид не беше доволно брз и балансот не беше идеален. Мислам дека губиме многу на правците, но во некои свиоци сме доста конкурентни."

"Со сигурност би сакале да бидеме побрзи, но П11 нè става на добра позиција за трката, со слободен избор на гуми, што ни овозможува да направиме нешто поразлично со стратегијата. Јасно е дека немавме брзина, но утре нашето темпо треба да биде поконкурентно."

Матија Биното, тимски шеф: "Нема смисла да се негира дека ова за нас беше разочарувачка квалификациска сесија. Знаевме дека почетокот на сезоната ќе биде тежок и денешниот резултат тоа го потврди, дури и повеќе отколку што очекувавме. Мора да го анализираме секој аспект на нашите перформанси и да го споредиме со конкурентите, обидувајќи се да разбереме зошто постои оваа разлика."

"Сега, ќе се подготвиме што е можно повеќе за утрешната трка, која ќе биде тешка и со многу непознати фактори. Тоа е прва трка од оваа чудна сезона. Ние ќе се обидеме да го извлечеме максимумот од пакетот што го имаме овде."

"Бесмислено е да се предвиди каде би можеле да завршиме и мора да се обидеме да забележиме што повеќе поени. Mалку радост ни донесоа нашите млади возачи, бидејќи тројца од нив се пласираа на Победничкиот Подиум во првата Ф2 трка."