МАКС ФЕРСТАПЕН: ИМАМЕ СТРАТЕГИЈА ЗА ПОБЕДА

Мерцедес АМГ денес имаше доминантен настап, беа во сопствена лига, додека останатите беа предводени од Макс Ферстапен кој успеа да се квалификува на третата стартна позиција.

Тимот на Ред Бул донесе храбра одлука за утрешната стратегија, која што резултираше во тоа што Холанѓанецот е единствениот возач во првите десет кој ќе стартува на жолти гуми.

Кристијан Хорнер верува дека тоа ќе им овозможи повеќе стратешки опции за трката. Се очекува зголемување на температурите во Шпилберг, што ни дава трошка надеж дека ќе може да парираат на Мерцедес АМГ.

Макс Ферстапен, П3: "Мислам дека третата стартна позиција е добар почеток, секако дека би сакал да се борам за Пол позиција, но, денес тоа не беше возможно. При еден круг на оваа патека ние никогаш не сме биле најсилни, но има работи што со сигурност можеме да ги подобриме за време на следниот викенд."

"Утре е нов ден и имаме различна стратегија, со старт на медиум гуми, споредено со сите други околу нас на гридот. Времето ќе биде потопло, па се надевам дека тоа ќе оди во наша корист. Тоа не значи дека Мерцедес АМГ ќе биде бавен, но се надевам дека ќе ја намалиме разликата."

"Прво, треба да имаме добар старт, бидејќи, не сакам да го направиме истото како минатата година, а потоа ќе сториме се што можеме за да се бориме за победа."

"Жално е што нашите фанови не се присутни на нашата домашна патека, бидејќи тие помагаат да се добие добра атмосфера, но ќе се обидеме да ја направиме утрешната трка возбудлива за сите што не гледаат на ТВ."