ВАЛТЕРИ БОТАС: СЕ ТРЕСЕВ ПО ЗАВРШУВАЊЕ НА КВАЛИФИКАЦИИТЕ

Тимот на Mерцедес АМГ го обезбеди првиот стартен ред за првата трка од 2020 сезона во Австрија. Валтери Ботас ја забележа својата 12-та Пол позиција во Формула 1, неговата прва во оваа сезона и трета во Австрија. Времето на денешните квалификации од 1:02.951 е нов рекорд на патеката Ред Бул Ринг.

Валтери Ботас, Пол позиција: "Ова чувствo e навистина добро. Ми недостигаше ова чувство, по квалификациите буквално се тресев. Ова е посебно чувство кога знаете дека исцедивте сè од болидот. Веќе долго време се подготвувавме за ова и никогаш не знаевме каде навистина се наоѓаме во поредокот. Но, нашиот тим направи неверојатна работа, многу е импресивно да се види крајниот резултат."

"Сè уште сме на почеток на сезоната, ова е само прва квалификациска сесија од 2020 сезоната, но јас сум импресиониран од тоа што успеа да постигне нашиот тим. Голема благодарност до сите во тимот, и овде на патеката и дома во фабриките, ова е навистина неверојатен болид за возење. Јас сум многу среќен со денешниот резултат, но утре се собираат поени, затоа да останеме смирени и да работиме за Победата."