МЕКЛАРЕН ТИМОТ КОЈ НАЈМНОГУ РАЗОЧАРА

Првите бодови во сезоната, кои минатиот викенд ги заработи Ландо Норис, веројатно станаа своевидна утеха за фановите на Мекларен, но не и за самиот тим.

Ова е најлошиот почеток на сезоната за Мекларен од 2017 година, па по првите две трки таа има само шест бода на своето конто. Минатата сезона барем еден болид на тимот се пласираше во Q3 сегментот од квалификациите, тогаш во 2022 година ова сè уште не сме го виделе.

Според The-Race, тимот на Мекларен се соочува со две главни задачи, на патеките сите мора да се обидат да го извлечат максимумот, а инженерите во базата во Вокинг треба да сфатат кои се недостатоците на MCL36 и да го пронајдат најдобриот начин да ги поправат.

Другите тимови кои немаа најдобар почеток на сезоната, како Мерцедес АМГ и Астон Мартин, јасно ставаат до знаење дека мора да применат поставки кои не им дозволуваат да го искористат својот целосен потенцијал.

Причината за принудниот компромис се вертикалните осцилации на болидот при големи брзини. Тие велат дека штом успеат да се справат со оваа појава, брзината треба да се зголеми.

Но, во случајот со Мекларен, се чини дека проблемот е поинаков. За време на развојот на MCL36, инженерите на тимот се фокусираа на одредено ниво на ефикасност на шасијата, што, можеби, дури и беше постигнато, само што конкурентите ја поставија границата на повисоко ниво.

"На крајот мора да признаеме дека другите тимови направија подобра работа во вонсезоната", рече Андреас Зајдл, тимскиот шеф на тимот. "Тоа објаснува зошто сме во оваа позиција. Тоа е она што брзо го препознавме во тимот. Важно е да се обидете да го искористите незадоволството од себе, да го преточите во корисна енергија."

Мекларен вели дека на болидот му недостасува аеродинамичка ефикасност и механички грип што ги обезбедува шасијата, но тие претпочитаат да не прецизираат што тргнало наопаку во процесот на градење на шасијата.

Или тимот не успеа да го постигне потребното ниво на потисна сила, или едноставно поставените цели не беа доволно високо поставени, во однос на своите конкуренти. Ситуацијата дополнително ја усложнија сопирачките, т.е. нивното прекумерно загревање.

Како резултат на тоа, Мекларен мораше да троши ресурси за да го отстрани овој проблем, наместо веднаш да бара надградби за брзина. Затоа, во моментов MCL36 е болидот кој нема капацитети да се бори за Топ 10 пласман во квалификациите. Секако, седмото место на Ландо Норис во Саудиска Арабија е причина за внимателен оптимизам, но Мекларен претпочитаат да не си ласкаат.

"Тимот успеа да го достигне она што е пропуштено на тестовите во Бахреин и во поголема мера да го искористи потенцијалот на болидот, од друга страна, можно е да се работи првенствено за конфигурацијата на брзата патека во Џеда, која многу подобро му одговараше на MCL36 отколку патеката Сакир."

Како и да е, во тимот се целосно свесни дека не се на посакуваното ниво на резултати, кое сите го очекуваат од Мекларен.