Поканата на Ки е следниот чекор кон транзицијата кон статусот на фабрички тим во 2026 година, во согласност со стратегијата развиена на почетокот на годината од страна на шефот на Заубер Груп, Андреас Зајдл.
Џејмс Ки веќе работеше во Хинвил како технички директор на Заубер од 2010 до 2012 година, каде што го предводеше развојот на C31, со кој беа забележани четири пласмани на подиумот за Серџо Перез и Камуи Кобајаши.
Андреас Зајдл, извршен директор на Заубер групацијата: "Воодушевен сум што Џејмс се врати дома во Хинвил. Тој ќе ни се придружи за да ја одредиме иднината на овој тим. Откако тој замина, тимот се промени многу, но го задржа истиот нагон, истиот фокус кон успехот."
"Сигурен сум дека заедно со овој многу талентиран и посветен тим ќе можеме да продолжиме да растеме понатаму. Назначувањето на Џејмс е голем чекор во ова патување, бидејќи тој има богато искуство во нашиот спорт, не само како технички директор, туку и на разни други позиции во техничката организација на тимот."
"Тој ќе ја води трансформацијата на техничкиот оддел, поставувајќи ја насоката за идните предизвици. Исто така, сакам да му се заблагодарам на Јан за неговиот вреден придонес да го донесе Заубер до каде што е денес, по нашата најуспешна сезона во повеќе од една деценија, во која се искачивме на шестото место во шампионатот за конструктори."
Џејмс Ки: "Среќен сум што се враќам во Хинвил за да работам со стари и нови колеги во Заубер. Имам многу убави спомени од времето поминато таму. Со нетрпение очекувам да го водам техничкиот штаб на тимот во една од најважните фази во неговата долга историја, во време кога нè очекува нова и возбудлива иднина."
"Имаме огромна работа да завршиме, но сигурен сум дека секој член на тимот на Хинвил ќе покаже посветеност и решителност да успееме да дојдеме до врвот. Знаеме дека за тоа ќе треба време, труд и упорност, а дивидендите од оваа работа ќе ги добиеме по две години, но имаме план по кој треба да дејствуваме."
