Со VF-25 се означува почетокот на нова ера за американскиот тим, со доаѓањето на Оливер Берман и Естебан Окон во тимот.
Тие ја обновија надежта по радикалната промена на возачката двојка, со вклучувањето на дебитантот Берман, кој минатата година изненади со своето смело деби за тимот на Ферари, заменувајќи го Карлос Саинц Јр. на трката во Саудиска Арабија.
За одбележување е и доаѓањето на францускиот возач, неодамна пристигнат од Алпин, кој ќе внесе "нова крв" во тимот. Моралот растеше како што одминуваа месеците, а со поинаква атмосфера ја дочекуваат десеттата сезона во шампионатот.
Според тоа, Џин Хас повеќе нема да мора да вложува пари од својот џеб за оваа година.
VF-25 ги направи своите први кругови во Силверстоун, на она што требаше да биде затворен за јавноста филмски ден. Но, фановите на Ф1 пронајдоа начин и го фотографираа изгледот за новата сезона.
Техничкиот директор на Хас Ф1 Андреа де Кордо и шефот на аеродинамиката Давид Паганели зборуваа за новиот болид и нивните планови за претстојната сезонa.
Андреа де Кордо: "2024 сезоната беше долга, но во однос на интеракцијата помеѓу италијанската и британската база, таа беше најдобра во последниве години. Дејствувавме похармонично, многу разговаравме и добро комунициравме."
"Значително го зајакнавме дизајнерскиот оддел, сериозно ја подобривме методологијата и контролните алатки и иако овој процес започна пред извесно време, имаме уште многу да направиме."
"Резултатите на патеката ги надминаа очекувањата. Испадна подобро отколку што можевме да се надеваме и иако не успеавме да го освоиме шестото место, генерално беше одлична година."
Давид Паганели: "Минатата година значително ги зголемивме ресурсите на одделот за дизајн и се чувствувавме уверени дека можеме да постигнеме повеќе. Расположението е позитивно, чувствуваме наплив на сила. Минатата сезона си докажавме и на себе и на другите дека добро си ја вршиме работата."
Андреа де Кордо: "Ефикасноста на болидот многу зависи од аеродинамиката, и на тоа се фокусиравме. Секоја година анализираме од што сме најнезадоволни во врска со болидот и се обидуваме да го решиме овој проблем."
"Минатата година болидот имаше некои специфични ограничувања од кои се обидовме да се ослободиме. Покрај тоа, се обидовме да ги подобриме неговите силни страни."
"Да видиме дали резултатот ќе ги исполни нашите очекувања. Ако го видиме на патеката она што го гледаме во воздушниот тунел, можеме значително да се подобриме уште од првата трка."
"Се обидовме да создадеме болид кој може да работи ефективно во различни услови. Минатата година ова беше нашата слаба точка, особено во топли услови. Се надевам дека сè ни успеа. Ќе дознаеме наскоро."
Андреа де Кордо: "Ќе ни треба време да се разбереме, да ги средиме сите ситници за да се чувствуваат удобно во болидот. Нашите нови возачи се многу посветени, позитивни и мотивирани. Со нетрпение очекуваме да работиме со нив."
Давид Паганели: "Не ни беше проблем да развиеме болид за различни возачи. Се обидовме да го дизајнираме болидот на таков начин што ќе ги затвориме неговите слаби точки, а новите возачи ќе ни помогнат во неговото фино подесување во текот на сезоната. И двајцата се стремат да го разберат болидот, подготвени се да се прилагодат, да го приспособат својот стил на возење. Многу е позитивно да се слушне ова."
Андреа де Кордо: "Резултатите ќе бидат уште поблиски, борбата ќе биде уште пожестока. Во ваква ситуација секој бод е важен, па мораме да одиграме најдобро што можеме. Треба максимално да се фокусираме на нашата работа и да не им оставаме шанси на противниците, инаку едноставно ќе загубиме пари."
Давид Паганели: "Сакаме да го подобриме она што го направивме минатата година и повторно да дејствуваме како тим, да работиме уште поблиску, уште похармонично, за да бидеме подготвени да го прифатиме новиот предизвик за работа со болидот според прописите од 2026 година."
Андреа де Кордо: "ФИА направи одлична работа во изготвувањето на правилата. Предизвикот е огромен, промените се сериозни: нова аеродинамична платформа, нови правила за управување со енергијата, сосема поинаков пристап за подобрување на ефикасноста. Велам предизвик, но ќе биде забавно."
Давид Паганели: "Веќе почнавме да работиме на болидот за 2026 година. Прописите на ФИА им дозволуваат на тимовите да почнат да работат на аеродинамиката од 2 јануари 2025 година, и тогаш почнавме да работиме на симулаторот и да го подготвуваме воздушниот тунел за новиот болид."
"Оваа година конкуренцијата ќе биде тешка, треба да се подготвуваме и да внесуваме нови делови како што напредува сезоната. Ќе ја користиме истата филозофија како и минатата година, прво да ги оцениме перформансите на новите делови, а потоа да продолжиме со дополнителни надградби."
