АВАНТУРИТЕ НА МАКС ПРЕД СПА-ФРАНКОРШАМП

Ред Бул е визионерска компанија, a нивниот Формуала 1 тим е секогаш подготвен да ги поддржи нивните идеи, па импресивните видеа што ги создаваат заедно се омилени ширум светот.

Во пресрет на трката за Големата Награда на Белгија, се случи премиерата на уште едно такво дело, кое според дејството, различните заплети и квалитетот на снимањето е сосема споредливо со краток авантуристички филм.

Главниот лик е Макс Ферстапен, кој се чини дека ќе вежба на нивниот симулатор, а инженерите на тимот ги играат споредните улоги. Но, вклучени се и многу други ликови, меѓу нив има "експлозивни" рудари, белгискиот велосипедист Воут ван Аерт, Гијом де Мевиус, мајсторот на рели трките, како и Тиери Нојвил, петкратен вицешампион во рели.

Првично, Макс започнува со тренинг на патеката СПА-Франкоршамп, што е логично во пресрет на трката во Белгија, но инженерите одлучуваат да му ја искомплицираат задачата, па тука започнува забавата.

Главната карактеристика на видеото е микс од реални снимки и компјутерска графика, па дејството се одвива на многу различен терен и во најразлични околности. Понекогаш е тешко да се забележи каде завршува реалниот свет, а започнува виртуелниот. Видеото трае околу седум минути, а за тоа време Ферстапен влегува во секакви неволји и учествува на разни натпревари, но, се разбира, тој секогаш победува.