ЧЕКО И ХОРНЕР ВО ПОСЕТА НА ЛАС ВЕГАС

На само три месеци од првата Формула 1 трка за Големата Награда на Лас Вегас, возачот на Ред Бул, Серџо Перез и тимскиот шеф, Кристијан Хорнер, отпатуваа во Невада за да ја загреат атмосферата со демо настап на РБ7.

Ред Бул од посетата на Лас Вегас сними прекрасен промотивен филм, наречен ¡Vamos, Vegas!, за инаугуралната трка која е закажана за 19-ти ноември. Чеко, возејќи го РБ7 имаше пустинска трка со Брајс Менциз, шесткратниот оф-роуд шампион и жител на Лас Вегас.

На настанот присуствуваа познатите ликови на Лас Вегас, како што се имитаторите на Елвис Присли, шоу-девојките, магионичарот Мет Франко, легендарната група Blue Man и господинот Лас Вегас, Вејн Њутн.

Кристијан Хорнер: "Сите со нетрпение ја очекуваат Големата Награда на Лас Вегас. Тоа е настан за кој сите сме многу возбудени. Саботната ноќна трка низ легендарниот Вегас Стрип ќе биде неверојатен спектакл. Снимање на овој краток филм со Чеко беше совршен начин да се подготвиме за она што доаѓа во ноември."

Нема сомнеж дека Големата Награда на Лас Вегас ќе биде апсолутен спектакл. Ова не е првпат Формула 1 да патува во Лас Вегас, но за првпат ќе гледаме тркање на главните улици на градот на гревот. За тоа треба да почекаме само малку повеќе од 90 дена.